პრემიერმინისტრის, ირაკლი ღარიბაშვილის თქმით, შეიძლება ითქვას, რომ Covid-19 თითქმის დამარცხებულია. მისი განცხადებით, მთავრობის, მინისტრისა და საბჭოს მიერ მწვანე ბარათების გაუქმების შემდეგ პროცესი სწორად იმართა, ახლა კი ყველაფერი სტაბილურადაა.

"მინდა, ჩვენს მოქალაქეებს ვახარო, რომ პრაქტიკულად Covid-19 თითქმის, შეიძლება ითქვას, რომ დამარცხებულია. დღეს ასეა, ყოველ შემთხვევაში, ეს სიტუაცია გვაქვს. დღეს, მაგალითად, 107 შემთხვევა იყო.

მე მინდა აქვე გავახსენო სკეპტიკოსებს, რომლებიც 2 თვის წინ ჩემს გამონათქვამებს აკრიტიკებდნენ, მაშინ ვთქვი, რომ მწვანე ბარათები, მას შემდეგ, რაც ომიკრონი შემოვიდა, ჩაანაცვლა სხვა შტამები, ჩვენ გავაუქმეთ იმიტომ, რომ აზრს კარგავდა აღნიშნული მწვანე ბარათი და მაშინ მივიღეთ ზოგიერთი გენიოსი ექსპერტებისგან კრიტიკა, რომ ეს როგორ გააკეთეს და ა.შ. მაგრამ ვნახეთ, რომ სულ რაღაც 2 თვეში პროცესი იმართა, სწორად იმართა მინისტრის მიერ, მთავრობის მიერ, საბჭოს მიერ, ამიტომ ყველაფერი არის სტაბილურად", — განაცხადა ღარიბაშვილმა.

11 აპრილის მონაცემებით, საქართველოში კორონავირუსის 107 ახალი შემთხვევა დადასტურდა, გამოჯანმრთელდა — 281, ხოლო გარდაიცვალა 6 ადამიანი.

ბოლო 24 საათში ქვეყნის მასშტაბით ჩატარდა 5 489 კვლევა ტესტით, მათ შორის, 3 743, კვლევა ანტიგენის ტესტით და 1 746 PCR ტესტით.