უკრაინის გენერალური პროკურორის, ირინა ვენედიტქტოვას განცხადებით, მას შემდეგ, რაც რუსული ძალები ტერიტორიიდან გაიყვანეს, კიევის რეგიონში 1 222 ცხედარი იპოვეს.

როგორც ვენედიტქტოვამ Sky News-ს უთხრა, უკრაინის ხელისუფლება იძიებს 5 600 სავარაუდო სამხედრო დანაშაულის შემთხვევას, რომელიც ჩადენილია რუსული ჯარების მიერ შეჭრის დაწყების შემდეგ. მისივე თქმით, დაადგინეს 500-ზე მეტი ეჭვმიტანილი სამხედრო დამნაშავე, მათ შორის რუსეთის უმაღლესი სამხედრო და სამთავრობო ჩინოვნიკები.

"რასაც ჩვენ ვხედავთ უკრაინის ყველა რეგიონში არის ომის დანაშაული, დანაშაული კაცობრიობის წინააღმდეგ და ჩვენ ყველაფერს ვაკეთებთ მის გამოსასწორებლად", — ამბობს ის.

პროკურორის თქმით, უკრაინას აქვს მტკიცებულება, რომ რუსეთმა განახორციელა სარაკეტო თავდასხმა მატარებლის სადგურზე აღმოსავლეთ ქალაქ კრამატორსკში, რის შედეგადაც დაიღუპა 50-ზე მეტი ადამიანი, რომლებიც შედარებით უსაფრთხო ადგილას გადასვლას ცდილობდნენ.