"რა ნეიტრალიტეტზეა საუბარი", — ასე ეხმაურება თბილისის მერი, კახა კალაძე პატრიოტთა ალიანსის რუსეთში ვიზიტს. მისი თქმით, როდესაც უკრაინაში ომია და ადამიანები იხოცებიან, ასეთი ვიზიტები მიუღებელია.

"რა ნეიტრალიტეტზეა საუბარი, მაშინ, როდესაც მეგობარი ქვეყანაში ომი მიმდინარეობს, ადამიანები იხოცებიან, ქვეყანა ინგრევა, ქალაქები ნადგურდება, ასეთი ვიზიტები ნამდვილად არ არის მისაღები და ჩემთვის პირადად კატეგორიულად მიუღებელია", — განაცხადა მან.

უკრაინაში მიმდინარე ომისა და ცივილიზებული სამყაროს მხრიდან რუსეთის სრული იზოლაციის ფონზე, პატრიოტთა ალიანსის ლიდერები, ირმა ინაშვილი და დავით თარხან-მოურავი აგრესორ ქვეყანაში ჩავიდნენ. ინფორმაცია ამის შესახებ პარტიას თავად არ გაუვრცელებია და ცნობილი რუსეთის ფედერაციის საბჭოს 4 აპრილის განცხადებიდან გახდა.

გუშინ, 6 აპრილს კალაძემ უკრაინის საგარეო საქმეთა მინისტრის, დმიტრო კულებას განცხადებაზე საუბრისას, რომ საქართველომ კონტრაბანდული საქონლის შეტანის ხელშეწყობასთან დაკავშირებულ ინფორმაციაზე დამაჯერებელი მტკიცებულებები უნდა აჩვენონ, თქვა, რომ მათ "კეთილი უნდა ინებონ და მტკიცებულებები თავადვე წარმოადგინონ, აქვე, დასძინა, რომ "ისეთი სამარცხვინო განცხადებები კეთდება, აღარაფერი სჯერა მაგათი".