უკრაინის გენერალური პროკურატურის განცხადებით, რუსეთის უკრაინაში შეჭრის დღიდან 167 ბავშვი დაიღუპა, 279-ზე მეტი კი დაშავდა. უწყების ცნობით, ამ დრომდე არსებული მონაცემებით, საომარ მოქმედებებს ყველაზე მეტი ბავშვი დონეცკისა და კიევის ოლქში ემსხვერპლა.

პროკურატურაში განმარტავენ, რომ ეს ცნობები არ არის სრული, რადგან ვერ ხერხდება დაბომბვის ადგილების შემოწმება აქტიური საომარი მოქმედებების ზონებში და დროებით ოკუპირებულ ტერიტორიებზე.

პროკურატურის ცნობით, ოკუპანტები განაგრძობენ ბავშვების იძულებით გაყვანას რუსეთის ტერიტორიაზე. მათივე თქმით, მარიუპოლის ძვლისა და ტუბერკულოზის რეგიონული ცენტრის სამედიცინო დაწესებულებიდან 12 ბავშვი გაიყვანეს, რომლებიც იქ მკურნალობდნენ.

როგორც პროკურატურა წერს, ასევე დედა, რომელიც საოჯახო ტიპის ბავშვთა სახლში 8 აყვანილ და 3 საკუთარ შვილს ზრდიდა, ბავშვებთან ერთად იძულებით გაიყვანეს რუსეთის ტერიტორიაზე.

უწყებაში ამბობენ, რომ დაბომბვის შედეგად დაზიანდა 927 სასწავლო დაწესებულება. მათგან 83 მთლიანად განადგურდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში