გერმანიის პრეზიდენტის, ფრანკ-ვალტერ შტაინმაიერის განცხადებით, Nord Stream 2-ის მიმართ ერთგულება შეცდომა იყო. მისივე თქმით, არ ეგონა, რომ პუტინი საკუთარი იმპერიული სიგიჟის გამო საკუთარი ქვეყნის განადგურებას დაუშვებდა.

"ჩვენ ვეჭიდებოდით ხიდს, რომლისაც რუსეთს აღარ სჯეროდა, რაზეც ჩვენი პარტნიორები გვაფრთხილებდნენ [...] არ მჯეროდა, რომ ვლადიმერ პუტინი, თავისი იმპერიული სიგიჟის გამო, საკუთარი ქვეყნის სრულ ეკონომიკურ, პოლიტიკურ და მორალურ განადგურებას დაუშვებდა. ამაში მე, ისევე, როგორც სხვები, შევცდი", — განაცხადა მან.

შტაინმაიერი იმ გერმანელ პოლიტიკოსებს განეკუთვნებოდა, რომლებიც რუსეთთან დათმობის პოლიტიკისა და მასთან მჭიდრო ეკონომიკური კავშირების მომხრე იყო.

წლების განმავლობაში აშშ და გერმანიის სხვა მოკავშირეები ბერლინს Nord Stream 2-ის მილსადენის გამო აკრიტიკებდნენ. ისინი ამბობდნენ, რომ ეს უკრაინისთვის საშიში იქნებოდა და 2014 წლის ყირიმის ანექსიის შემდეგ რუსეთს არასწორ სიგნალს გაუგზავნიდა. მიუხედავად ამისა, გერმანიის იმდროინდელი კანცლერი, ანგელა მერკელი ამტკიცებდა, რომ Nord Stream 2 კომერციული პროექტი იყო მას პოლიტიკასთან კავშირი საერთოდ არ ჰქონდა.

გერმანიის კანცლერმა, ოლაფ შოლცმა, Nord Stream 2-ის სერტიფიცირების პროცესის შეჩერებაზე პუტინის მიერ უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარების შემდეგ განაცხადა.