ოსკარის რიგით 94-ე დაჯილდოების დასამახსოვრებელ მომენტად უილ სმიტსა და კრის როკს შორის მომხდარი ინციდენტი იქცა. ამ ინციდენტის მიზეზი ის იყო, რომ კრის როკმა ოსკარის ცერემონიაზე ჯეიდა პინკეტ სმიტის გადაპარსულ თავზე იხუმრა. პასუხად კი ჯეიდას ქმარმა, მსახიობმა უილ სმიტმა, კრის როკს სახეში გაარტყა. უილ სმიტმა კრის როკს ბოდიში უკვე საჯაროდ მოუხადა და კინოაკადემიაც დატოვა, თუმცა სმიტის ქმედებას დღემდე ბევრი აკრიტიკებს და მათ შორისაა ჯიმ კერიც.

"კრის როკს აურზაური არ სურს. მის ადგილზე უილ სმიტს ვუჩივლებდი და 200 მილიონს მოვითხოვდი ზარალისთვის, რადგან გარტყმის ვიდეო სამუდამოდ ინტერნეტში დარჩება და ეს შეურაცხყოფა დიდხანს გაგრძელდება. უილ სმიტის საქციელის შემდეგ ხალხის ოვაციებმა გული ამირია. ჰოლივუდი უპრინციპო მასად გადაიქცა და ეს იმაზე მიუთითებს, რომ ძველებურად მაგრები აღარ ვართ", — განაცხადა ჯიმ კერიმ CBS-თან ინტერვიუში.

ამ განცხადებიდან მალევე სოციალურ ქსელების მომხმარებელმა გაიხსენეს, რომ არც ჯიმ კერის აქვს უნაკლო რეპუტაცია. სოციალურ ქსელებში 1997 წლის MTV Movie Awards-ის ვიდეო გავრცელდა, რომელშიც ჯიმ კერი დაჯილდოების წამყვანს უნებართვოდ კოცნის. ერთ-ერთი მომხმარებელი წერს, რომ 35 წლის ჯიმ კერი 20 წლის ალისია სილვერსტოუნს ნებართვის გარეშე კოცნის, ქალი კი ცდილობს, რომ მსახიობი თავიდან მოიშოროს. " [სხვას აკრიტიკებს] ადამიანი, რომელმაც ალისია სილვერსტოუნი სცენაზე სექსუალურად შეავიწროვა", — წერს ტვიტერის მომხმარებელი.

ასევე გაიხსენეს მომენტი, როცა იმავე დაჯილდოებაზე საუკეთესო კოცნის კატეგორიაში გაიმარჯვების შემდეგ ჯიმ კერი ცდილობდა, რომ უილ სმიტისთვისაც ეკოცნა, მაგრამ მსახიობმა ამის ნება არ მისცა.

სოციალური ქსელების მომხმარებლებმა ისიც გაიხსენეს, რომ წარსულში ჯიმ კერი თავის იმდროინდელ შეყვარებულ ჯენი მაკარტისთან ერთად ვაქცინაციის წინააღმდეგ ინფორმაციას ავრცელებდა. ტვიტერის ერთ-ერთი მომხმარებლის თქმით, ჯიმ კერი ხელს უწყობდა იმ მითის გავრცელებას, რომლის მიხედვითაც ვაქცინა აუტიზმს იწვევს. ჯიმ კერიმ ამ თემის შესახებ ერთ-ერთი გადაცემის პირდაპირ ეთერშიც ისაუბრა და ვაქცინაციის შესახებ საკუთარი ეჭვები გამოთქვა.

ასევე იხილეთ: