"ასე ვიფიქრეთ, რომ სამძიმარი გამოვუცხადოთ, მაგრამ იმ პოლიტიკიდან გამომდინარე, რასაც ჩვენ მოხალისეებთან დაკავშირებით და ჩვენი სტრატეგიული პარტნიორები ეწევიან, ასე მოვქცეულიყავით და ხომ არ შეგვეკავებინა თავი. შეიძლება ვცდებოდეთ, მაგრამ ეს არის გულწრფელი პასუხი", — ასე პასუხობს ქართული ოცნების აღმასრულებელი მდივანი, მამუკა მდინარაძე კითხვას, თუ რატომ არ მივიდნენ ხელისუფლების წარმომადგენლები უკრაინაში დაღუპული ქართველი მებრძოლის პანაშვიდზე.

მისი თქმით, როდესაც ქვეყანა აცხადებს წინააღმდეგობას მოხალისეების საკითხთან დაკავშირებიღ, ჩნდება უხერხული მომენტი იმაზე, თუ როგორ უნდა მოიქცნენ ხელისუფლების წარმომადგენლები ამ დროს.

"როდესაც ქვეყანა, არამხოლოდ საქართველო, არამედ ამერიკის შეერთებული შტატები, დიდი ბრიტანეთი და ა.შ. აცხადებს წინააღმდეგობას მოხალისეებთან დაკავშირებით, მაშინ ჩნდება ერთი ძალიან უხერხული მომენტი იმასთან დაკავშირებით, ხელისუფლების წარმომადგენლები როგორ უნდა იქცეოდნენ ამ დროს. რაიმე მათი მოქმედება, თუნდაც გულწრფელი სამძიმარი აღიქმება თუ არა წახალისებად გარკვეული ქმედებების იმ ფონზე, როდესაც აშშ, ბრიტანეთი, NATO-ს ქვეყნები, მათ შორის, მათთან ერთად საქართველოც იგივე პოზიციას აფიქსირებს და ახმოვანებს მოხალისეებთან დაკავშირებით, რომ ჩვენ არ ვუშვებთ მოხალისეებს, ვერ ვუშვებთ ბევრი პოლიტიკური ფაქტორის გამო მოხალისეებს. ამ დროს ჩვენ უნდა დავფიქსირდეთ თუ არა იქ, თუ უბრალოდ, უნდა შემოვიფარგლოთ იმით, რასაც ვაკეთებთ.

აქვე ვისარგებლებ შემთხვევით და სამძიმარს გამოვუცხადებ, გულწრფელ სამძიმარს, არა მოჩვენებითს, როგორც ზოგიერთები, გულწრფელ სამძიმარს ვუცხადებ დაღუპულების ოჯახებს, მაგრამ მეორე საკითხია ის, რაც არის, ერთი მხრივ, პროტოკოლური, მეორე მხრივ, უხერხული იმდენად, რამდენადაც ეს არის თუ არა წამახალისებელი ეფექტის მატარებელი. ამაზე დავა შეიძლება. შეიძლება ამაზე ვიკამათოთ", — განმარტავს მდინარაძე.

31 მარტს ქაშუეთის ეკლესიაში უკრაინაში დაღუპული ქართველი მებრძოლის, დავით გობეჯიშვილის სამოქალაქო პანაშვიდი გაიმართა.