რუსეთის საგარეო საქმეთა მინისტრმა, სერგეი ლავროვმა თალიბანის მთავრობის დიპლომატს რუსეთში აკრედიტაცია მისცა. მან ასევე აღნიშნა, რომ განიხილავენ დიპლომატიური და ეკონომიკური ურთიერთობების გაფართოებას.

"მინდა აღვნიშნო, რომ ახალი ხელისუფლების გაგზავნილმა პირველმა ავღანელმა დიპლომატმა, რომელიც მოსკოვში გასულ თვეში ჩავიდა აკრედიტაცია მიიღო რუსეთის საგარეო საქმეთა სამინისტროსგან", — თქვა ლავროვმა.

თალიბანმა ავღანეთზე კონტროლი გასული წლის, მას შემდეგ მოიპოვა, რაც აშშ-ის პრეზიდენტმა, ჯო ბაიდენმა ავღანეთიდან ამერიკული ჯარები გაიყვანა.

31 აგვისტოს ოფიციალურად დასრულდა ევაკუაციის პროცესი და 20-წლიანი ომის შემდეგ ავღანეთი უკანასკნელმა ამერიკელმა სამხედრომაც დატოვა. 8 სექტემბერს მოლა ჰასან ახუნდის ხელმძღვანელობით, თალიბანმა ახალი მთავრობის შემადგენლობა დაასახელა.