თავდაცვის სამინისტროს ცნობით, თბილისის საქალაქო სასამართლომ სრულად დააკმაყოფილა მათი სარჩელი და თავდაცვის ყოფილ მინისტრს, დავით კეზერაშვილსა და შესყიდვების დეპარტამენტის ყოფილ უფროსს, ალექსანდრე ნინუას დაეკისრათ 5 060 000 ევროს ექვივალენტი ლარში სამინისტროს სასარგებლოდ.

კეზერაშვილსა და ნინუას პროკურატურის მიერ სამსახურებრივი უფლებამოსილების ბოროტად გამოყენებისა და სახელმწიფოს დიდი ოდენობით ფულადი თანხების მითვისება/გაფლანგვის ფაქტზე წარედგინათ ბრალი. საქმე ეხებოდა ოფშორულ ზონაში რეგისტრირებული კომპანია GIRWOOD BUSINESS CORP-ის სასარგებლოდ გარკვეული მომსახურების გაწევის მიზნით დიდი ოდენობით თანხის გადარიცხვას. თავდაცვის სამინისტროს თქმით, სამინისტროს ეს მომსახურება არ მიუღია.

უზენაესმა სასამართლომ 2021 წლის 7 სექტემბრის გამამტყუნებელი განაჩენის საფუძველზე კეზერაშვილი და ნინუა დამნაშავედ ცნო.