ქართული ოცნების თავმჯდომარე ირაკლი კობახიძე ამტკიცებს, რომ საქართველოდან უკრაინის ელჩის გაწვევა იყო "ომის პარტიის", ნაციონალური მოძრაობის მიერ ორგანიზებული პოლიტიკური ზეწოლის აქტი.

"საქართველოდან უკრაინის ელჩის გაწვევაც იყო ომის პარტიის მიერ ორგანიზებული პოლიტიკური ზეწოლის აქტი, რომელიც საზოგადოებაში მღელვარების გამოწვევასა და საქართველოს ხელისუფლების პოლიტიკის ცვლილებას ისახავდა მიზნად", — თქვა მან.

პირველ მარტს უკრაინის პრეზიდენტმა საქართველოდან უკრაინის ელჩი გაიწვია. ზელენსკი ამბობს, რომ მიზეზი სანქციებზე "ამორალური პოზიცია" და უკრაინაში მოხალისეების წასვლაში ხელის შეშლაა.

მთავრობამ კი თქვა, რომ ეს გაუგებარი გადაწყვეტილება იყო. მათი თქმით, საქართველოს ხელისუფლების პოზიცია უკრაინელი ხალხის მხარდაჭერაზე უცვლელი რჩება. მთავრობაში მაშინაც ისაუბრეს და ამტკიცებდნენ, რომ ამ გადაწყვეტილებაში ნაციონალური მოძრაობაც იყო ჩართული.