არაერთ რუსულ ვებგვერდზე გავრცელებულ ინფორმაციას, რომ ქართული ჯგუფი "მგზავრები" აპრილში კონცერტის ჩატარებას გეგმავდა მოსკოვში, სოციალური ქსელების ქართველი მომხმარებლები კრიტიკულად შეხვდნენ, რასაც მალევე ჯგუფიც გამოეხმაურა ოფიციალური პოზიციით.

"გავრცელებული ინფორმაცია მგზავრების საკონცერტო ტურნესთან დაკავშირებით რუსეთში არის დეზინფორმაცია და სიცრუე", — ვკითხულობთ "მგზავრების" ფეისბუქგვერდზე გამოქვეყნებულ ტექსტში.

განცხადებაში აღნიშნულია ისიც, რომ კონცერტებთან დაკავშირებული ოფიციალური ინფორმაცია მათ ვებგვერდზე უნდა გადამოწმდეს და "ნუ ენდობით რუსულ წყაროებს".

ამჟამად (27 მარტი, 16:05 სთ) "მგზავრების" ოფიციალურ ვებგვერდზე კონცერტებთან დაკავშირებული განყოფილება მთლიანად ცარიელია.

რუსულ წყაროებში აქტიურად ვრცელდებოდა ინფორმაცია, რომ აპრილში "მგზავრებს" ახალი ალბომის პრეზენტაციასთან დაკავშირებით არაერთი კონცერტი ჰქონდათ დაგეგმილი მოსკოვში.

სამომავლო კონცერტი რამდენიმე რუსულმა კლუბმა ჯერ კიდევ თებერვალში დააანონსა.

ეს პირველი შემთხვევა არ იქნებოდა, როცა "მგზავრები" კონცერტს რუსეთში გამართავდნენ: ბოლო წლების განმავლობაში მათ არაერთხელ ჰქონიათ საკონცერტო ტურნე ოკუპანტი ქვეყნის ტერიტორიაზე, მათ შორის დედაქალაქ მოსკოვშიც.

აღსანიშნავია ისიც, რომ მას შემდეგ, რაც რუსეთი უკრაინაში შეიჭრა და დღემდე სრულმასშტაბიან ომს აწარმოებს უდანაშაულო მოსახლეობის წინააღმდეგ, ჯგუფი მგზავრების სოციალური მედიის სხვადასხვა პლატფორმაზე უკრაინის მხარდამჭერი რამდენიმე ინფორმაცია გავრცელდა: მათ შორის ისიც, რომ ბენდი უკრაინის დასახმარებლად კონცერტში მიიღებს მონაწილეობას.