რუსეთის საბჭოს სენატორმა, გრიგორი კარასინმა საქართველოს ხელისუფლება "შეაქო" რუსეთისთვის დაკისრებულ სანქციებზე საქართველოს პოზიციის გამო. მის თქმით, პოზიცია "დაბალანსებული" იყო და კრემლს ეს ფაქტი "შეუმჩნეველი არ დარჩება".

რუსეთის ფედერაციის საბჭოს განცხადებით, კრემლის მიერ შექმნილ გორჩაკოვის ფონდისა და პრიმაკოვის სახელობის ცენტრის ორგანიზებით მოსკოვში შეხვედრა 24 მარტს გაიმართა, სადაც "ექსპერტებმა", მათ შორის კარასინმაც, საქართველო-რუსეთის ურთიერთობები განიხილეს.

როგორც ფედერაციის საბჭო წერს, კარასინმა იმედი გამოთქვა ჟენევის დისკუსიების განახლების შესახებ. მისი თქმით, ამ ფორმატში პირდაპირი საუბრის შესაძლებლობაა საქართველოსა და დე ფაქტო აფხაზეთსა და დე ფაქტო სამხრეთ ოსეთს შორის.

ინფორმაცია შეხვედრაზე თავად გორჩაკოვის ფონდსაც ედო, თუმცა ახლა აღარ იძებნება.

კარასინის განცხადებას მმართველ გუნდში გამოეხმაურნენ, თუმცა ამჯერადაც ოპოზიციის კრიტიკით. დეპუტატმა, არჩილ თალაკვაძემ "გონივრული ეჭვი გამოთქვა", რომ დესტრუქციული ძალებისთვის კეთდება ასეთი განცხადებები. მისი განცხადებით, არცერთი ასეთი შექება, არცერთი ასეთი რევერანსი რუსეთის ფედერაციის მხრიდან საქართველოს ხელისუფლებისთვის არაფერს არ ნიშნავს.

2010 წელს რუსეთის იმჟამინდელი პრეზიდენტის, დიმიტრი მედვედევის განკარგულებითა და საგარეო საქმეთა სამინისტროს თანამონაწილეობით შექმნილი. ფონდის მიზნად სახელდება გლობალიზაციის პირობებში, რუსეთის ინტერესების შესაბამისად, "სახალხო დიპლომატიის" გაძლიერება და რუსული ორგანიზაციების ფინანსური მხარდაჭერა.

გორჩაკოვის მიერვეა დაფუძნებული პრიმაკოვის სახელობის ფონდი, რომელიც სპეციალურად ქართულ-რუსული ურთიერთობების "ნორმალიზებისთვის" 2013 წელს შეიქმნა. პრიმაკოვის ფონდის ხელმძღვანელები ამტკიცებენ, რომ ცენტრის შექმნის აუცილებლობა რუსულ-ქართულ ურთიერთობებში გაჩენილმა დეფიციტმა გამოიწვია და მრავალწლიანმა კრიზისმა "დიალოგის აუცილებლობა წარმოაჩინა". მათივე მტკიცებით, სურთ გამოავლინონ არსებული პრობლემები და დაიწყონ გზების ძებნა მოსაგვარებლად.