Barclays-ისა და Goldman Sachs-ის ეკონომისტებმა რუსეთთან დაკავშირებული პროგნოზები შეამცირეს. მათი მოლოდინების მიხედვით, მიმდინარე წელს რუსეთის ეკონომიკის ორნიშნა ვარდნაა მოსალოდნელი. ინფორმაციას Bloomberg ავრცელებს.

Barclays რუსეთის ეკონომიკასთან დაკავშირებულ ერთ-ერთ ყველაზე პესიმისტურ ხედვას აქვეყნებს და წერს, რომ წელს ამ ქვეყნის ეკონომიკის 12,4%-იან ვარდნას ელოდება. ორგანიზაციის შეფასებით, რუსეთის ეკონომიკა 2023 წელს 3,5%-ით შემცირდება.

ეკონომიკური ზრდის მოლოდინები შეამცირა Goldman-მაც, რომელიც მიმდინარე წელს რუსეთის ეკონომიკის 10%-ით შემცირებას პროგნოზირებს. აქამდე ორგანიზაცია 7%-იან ვარდნას ვარაუდობდა.

"არსებული გეოპოლიტიკური მდგომარეობიდან გამომდინარე, ჩვენ ვვარაუდობთ, რომ სანქციები გრძელვადიანი იქნება", — თქვა Barclays-ის ეკონომისტმა ბრაჰიმ რაზგალაშმა.

ბანკის ანგარიშში წერია, რომ რუსეთის ეკონომიკის შენელება თანდათანობით დაჩქარდება 2022 წლის შუა პერიოდიდან, როდესაც სანქციების შედეგები სრულად აისახება ქვეყნის ეკონომიკაზე. "ჩვენ ველით, რომ ეკონომიკის შემცირება გამოქვეული იქნება მოხმარების, ინვესტიციებისა და იმპორტის შემცირების შედეგად.

აქვე უნდა აღინიშნოს, რომ Bloomberg Economics-ის პირველადი პროგნოზის თანახმად, რუსეთის მთლიანი შიდა პროდუქტი წელს დაახლოებით 9%-ით შემცირდება.

"რუსეთის ექსპორტი უფრო ძლიერად არის შეფერხებული, ვიდრე თავდაპირველად ვივარაუდეთ", — ამბობენ Goldman-ის ეკონომისტები, რომლებსაც კლემენს გრაფი ხელმძღვანელობს. Goldman-ში ვარაუდოებენ, რომ რუსეთის გაზის ექსპორტი შეუფერხებლად გაგრძელდება, თუმცა ნავთობის მიწოდების 20%-მდე შემცირებას პროგნოზირებენ.

Goldman-ის შეფასებით, მეორე კვარტალში რუსეთის ექსპორტის 20%-იანი შემცირებაა მოსალოდნელი, ხოლო წლიურად კლება 10% იქნება. ბანკი მიმდინარე წელს იმპორტის 20%-ით ვარდნას ელოდება.

Barclays-სგან განსხვავებით, Goldman მომავალი წლებისთვის რუსეთის ეკონომიკის "ნელ აღდგენას" ვარაუდობს. ბანკის პროგნოზით, 2023 წელს რუსეთის ეკონომიკა 2,4%-ით, ხოლო 2024 წელს 3,4%-ით გაიზრდება.