ერთიანი ნაციონალური მოძრაობის ერთ-ერთი ლიდერის, ზაზა ბიბილაშვილის განცხადებით, კონკრეტულად ერთი ადამიანის წინააღმდეგაა მიმართული ცენტრალური საარჩევნო კომისიის საკანონმდებლო წინადადებაში გაკეთებული ჩანაწერი.

ამ ინიციატივის მიხედვით, წინასაარჩევნო კამპანიაში იმ პირის მონაწილეობა, რომელსაც ამის უფლება არ აქვს, დარღვევად მიიჩნევა და პარტია დაჯარიმდება:

"საარჩევნო კოდექსში კეთდება ჩანაწერი, რომლის მიხედვითაც მიხეილ სააკაშვილის მიერ ნაციონალური მოძრაობის მიმართ მხარდაჭერის გამოხატვის შემთხვევაში, დაჯარიმდება მთავარი ოპოზიციური პარტია".

ინიციატივის თანახმად, კოდექსს, სავარაუდოდ, დაემატება შემდეგი შინაარსის 71 პუნქტი: კანონით დადგენილი წინასაარჩევნო კამპანიის წესების დარღვევად მიიჩნევა იმ პირის მონაწილეობის დაშვება აგიტაციაში, ვისაც აგიტაციაში მონაწილეობის უფლება არ აქვს და მის მიმართ ვერ ხორციელდება ადმინისტრაციულ სამართალდარღვევათა კოდექსით გათვალისწინებული სამართალდარღვევის საქმის წარმოება.

ზაზა ბიბილაშვილის შეფასებით, ამ ნაბიჯით ცესკო ადასტურებს, რომ ეს ორგანო ასრულებს ივანიშვილის პოლიტიკურ დაკვეთას და ვერ განიხილება არჩევნების ჩამტარებელ დამოუკიდებელ უწყებად.