მელიტოპოლში დღეს გატაცებული ჟურნალისტები გაათავისუფლეს. დღისით გავრცელდა ინფორმაცია, რომ ბოევიკებმა მათ სახლებში მიაკითხეს და სურვილის საწინააღმდეგოდ წაიყვანეს.

უკრაინსკა პრავდა, უკრაინის ჟურნალისტთა ეროვნულ კავშირზე დაყრდნობით წერს, რომ დაკავებულები გაათავისუფლეს მას შემდეგ, რაც "დამპყრობლებთან თანამშრომლობის აუცილებლობაზე" ესაუბრნენ. შეგახსენებთ, რომ მელიტოპოლს ახლა საოკუპაციო ჯარები აკონტროლებენ.

იმ მედიაჰოლდინგის დირექტორმა, რომლის თანამშრომლებიც ოკუპანტებმა წაიყვანეს, განაცხადა, რომ მათ ჩამორთმეული ჰქონდათ ტელეფონები, ხოლო ერთ-ერთის სახლიდან ამოიღეს სერვერი. მისივე თქმით, ერთი კვირის წინ მას ოკუპანტებმა დაურეკეს სასაუბროდ და შესთავაზეს "მხარდაჭერა".

"შევხვდით რედაქციაში, სადაც თვითნებურად შემოვიდნენ და გაჩხრიკეს. უნდათ, რომ ერთგულები ვიყოთ და მხარი დავუჭიროთ. თანხმობა არ მივეცი და დავიშალეთ", — განაცხადა მან.

ჟურნალისტთა ეროვნული კავშირი გმობს მელიტოპოლში, ბერდიანსკში, ხერსონში დამპყრობლების მიერ ჟურნალისტების დაშინებასა და ზეწოლას.

15 მარტს ბერდიანსკში hromadske-ს ჟურნალისტი ვიკტორია როშჩინა გაუჩინარდა. მისი ადგილსამყოფელის შესახებ ინფორმაცია არ არსებობს, თუმცა ჟურნალისტი შესაძლოა რუსი სამხედროების ტყვეობაში იყოს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში