საქართველოს ფოსტა მისი თანამშრომლის, კურიერის მიერ საახალწლო საჩუქრების შესაძლო მითვისების საქმეზე, განცხადებას ავრცელებს. On.ge-სთვის დღეს ცნობილი გახდა, რომ ამ საქმეზე პროკურატურა გამოძიებას ატარებს და გამოსაკითხად დაბარებულია აქციაში მონაწილე პირი.

ფოსტა დაზარალებულებს სთხოვს გამოძიებასთან ითანამშრომლონ, რათა საქმის გამოძიება სწრაფად დასრულდეს.

"საახალწლო კამპანიის მიმდინარეობისას დაფიქსირდა უსიამოვნო შემთხვევა - სამწუხაროდ, ზღაპრული გრინჩი რეალობაში გვეწვია. დაიკარგა რამდენიმე გზავნილი და ვითარების გამოსავლენად საქმეში ჩაერთნენ სამართალდამცავები. ამის გამო, რამდენიმე შესაძლო დაზარალებულს უკავშირდებიან, რათა დადგინდეს დაკარგული გზავნილების შესახებ დეტალები. მადლიერი დაგრჩებით, თუ შეძლებთ, რომ ცოტაოდენი დრო დაუთმოთ სამართალდამცველებს, რითაც საქმის სწრაფად დასრულებაში დაეხმარებით," - აღნიშნულია საქართველოს ფოსტის განცხადებაში.

Secret Santa საქართველოს ბანკის პროექტი იყო. ნებისმიერ მსურველს შეეძლო პროექტში ჩართულიყო და გაეცა და მიეღო უცნობი ადამიანისგან საახალწლო საჩუქარი. ნივთების უფასოდ ტრანსპორტირება საქართველოს ფოსტას ევალებოდა. გამოძიება, სავარაუდოდ, ფოსტის თანამშრომლის ქმედებასთან დაკავშირებით მიმდინარეობს.