საქართველოს პროკურატურა Secret Santa-ს პროექტის ფარგლებში საქართველოს ფოსტის კურიერის მიერ ამანათების შესაძლო მითვისების საქმეს იძიებს. ამის შესახებ On.ge-ს საქმის პროკურორმა განუცხადა.

საქმესთან დაკავშირებით დაკითხვაზე უკვე დაიბარეს პროექტის ერთ-ერთი მონაწილე, ნინიკო რობაქიძე. მისი თქმით, მას დღეს, 24 აპრილს დაურეკეს და უთხრეს, რომ პროკურატურაში 25 აპრილს Secret Santa-ს პროექტში კურიერის მხრიდან ამანათების შესაძლო მითვისების საქმეზე უნდა მივიდეს.

Secret Santa საქართველოს ბანკის პროექტი იყო. ნებისმიერ მსურველს შეეძლო პროექტში ჩართულიყო და გაეცა და მიეღო უცნობი ადამიანისგან საახალწლო საჩუქარი. ნივთების უფასოდ ტრანსპორტირება საქართველოს ფოსტას ევალებოდა. გამოძიება, სავარაუდოდ, ფოსტის თანამშრომლის ქმედებასთან დაკავშირებით მიმდინარეობს.

On.ge ამ დრომდე ვერ დაუკავშირდა საქართველოს ფოსტის წარმომადგენლებს.