თუ უკრაინაში ცხოველების დახმარება გინდა, შეგიძლია, ზოოპარკის ბილეთი იყიდო

უკრაინის ომის შედეგად უამრავი უდანაშაულო ადამიანი დაზარალდა, თუმცა არ უნდა დაგვავიწყდეს ცხოველებიც, რომლებიც ზოოპარკებში არიან ჩარჩენილები და წასასვლელი არსად აქვთ.

უკრაინელები ცხოველებს გასაჭირში არ ტოვებენ და ზოოპარკის თანამშრომლები თავს საფრთხეში იგდებენ, რათა ყოველდღიურად საკვები და წამლები ადგილზე მიიტანონ. გარდა ამისა, უკრაინელებმა ზოოპარკში ცხოველების დახმარების ახალი გზაც მოიფიქრეს: მიკოლაევის ზოოპარკის ვებგვერდზე უკრაინელები ბილეთებს ყიდულობენ, რათა ზოოპარკს ფინანსურად დაეხმარონ.

"მიკოლაევის ზოოპარკის ცხოველებს ომის პერიოდში ცხოვრება ძალიან უჭირთ. მას შემდეგ, რაც ინფორმაცია გავრცელდა, რომ რუსეთმა ამ ქალაქსაც დაარტყა, ცხოველების მხარდასაჭერად უკრაინელებმა ზოოპარკის ბილეთების ყიდვა ონლაინრეჟიმში დაიწყეს. 21 მარტის ჩათვლით ყველა ბილეთი გაყიდულია. ბილეთის ყიდვა თქვენც შეგიძლიათ და ის მხოლოდ 3 დოლარი ღირს", — წერს უკრაინელი დიპლომატი და ავსტრიაში უკრაინის ყოფილი ელჩი, ოლექსანდრ შერბა.

მიკოლაევის ზოოპარკში ჩარჩენილი ცხოველების დახმარება ნებისმიერ მსურველს შეუძლია. ამისათვის კი ამ ბმულზე ინსტრუქციებს უნდა მიჰყვე.

რაც შეეხება კიევის ზოოპარკს, ამ დროისთვის იქ 4000-მდე ცხოველია. ცხოველთა უმეტესობას ბომბებისა და ცეცხლსასროლი იარაღის სროლის ხმის გაგონება აშინებს და ასეთ გარემოში ცხოვრება ძალიან უჭირს.