ცნობილია, რომ მომავალ შაბათ-კვირას დონალდ ტრამპი თეთრი სახლის კორესპონდენტთა ასოციაციის ტრადიციულ წვეულებას გამოტოვებს, თუმცა, როგორც ამერიკის შეერთებული შტატების პრეზიდენტმა ცოტა ხნის წინ განაცხადა, ამ საღამოს პარალელურად პენსილვანიაში თავის მხარდაჭერებთან შეხვედრას გამართავს.

ამის შესახებ აშშ-ს პრეზიდენტმა მსოფლიოს ტვიტერიდან ამცნო:

"მომავალ შაბათ ღამით პენსილვანიაში დიდ მხარდამჭერ მიტინგს გავმართავ, ველოდები ამ დღეს".

ტრამპმა თებერვლის ბოლოს განაცხადა, რომ თეთრი სახლის კორესპონდენტთა ასოციაციის ყოველწლიურ სადილს, რომელიც 29 აპრილსაა დაგეგმილი, გამოტოვებდა. წვეულებას ესწრებიან ცნობილი პირები, ჟურნალისტები, პოლიტიკოსები და ტრადიციულად - ამერიკის პრეზიდენტი.

2011 წელს, ბარაკ ობამამ, რომელიც თეთრი სახლის კორესპონდენტთა ასოციაციის წვეულებას თავისი პრეზიდენტობის თითოეულ წელს ესწრებოდა, იხუმრა, რომ მისტერ ტრამპი თეთრ სახლს კაზინოდ გადააქცევდა, პრეზიდენტი რომ გამხდარიყო. წვეულებას ესწრებოდა თავად დონალდ ტრამპიც, რომელიც ბარაკ ობამას ხუმრობებით ნასიამოვნები არ ჩანდა.