ამერიკის პრეზიდენტმა დონალდ ტრამპმა ტვიტერის საშუალებით მსოფლიოს ამცნო, რომ თეთრი სახლის კორესპონდენტთა ასოციაციის ყოველწლიურ სადილს, რომელიც 29 აპრილსაა დაგეგმილი, არ დაესწრება.

"წელს არ დავესწრები თეთრი სახლის კორესპონდენტების ასოციაციის მიერ გამართულ სადილს. ყველას საუცხოო საღამოს გისურვებთ".

წვეულებას ესწრებიან ცნობილი პირები, ჟურნალისტები, პოლიტიკოსები და როგორც წესი - ამერიკის პრეზიდენტი.

სადილს პროტესტს უცხადებს რამდენიმე ჟურნალისტი და მედიის წარმომადგენლები, მათ შორის Bloomberg და New Yorker.

ტრამპის გადაწყვეტილებას წინ უძღოდა თეთრი სახლის მიერ პრესკონფერენციაზე ისეთი გამოცემების დაბლოკვა, როგორიცაა BBC, CNN, The New York Times და სხვები.

აღნიშნულზე პროტესტი გამოხატა თეთრი სახლის კორესპონდენტების ასოციაციამ.

იმავე დღეს, დონალდ ტრამპი ვაშინგტონის გარეთ კონფერენციას მართავდა, სადაც განაცხადა, რომ მედია გამოცემების რამდენიმე წარმომადგენელი "ხალხის მტრები არიან".

ტრამპმა ასევე თქვა, რომ, რეპორტიორებს ანონიმური წყაროების გამოყენების უფლება არ უნდა ჰქონდეთ.

დონალდ ტრამპი WHCA-ს წვეულებაზე 2011 წელს

დონალდ ტრამპი თეთრი სახლის კორესპონდენტთა ასოციაციის საღამოზე. 2011 წელი.

ფოტო: კადრი ვიდეოდან / CNN

2011 წელს, ბარაკ ობამამ, რომელიც თეთრი სახლის კორესპონდენტთა ასოციაციის წვეულებას თავისი პრეზიდენტობის თითოეულ წელს ესწრებოდა, იხუმრა, რომ მისტერ ტრამპი თეთრ სახლს კაზინოდ გადააქცევდა, პრეზიდენტი რომ გამხდარიყო. წვეულებას ესწრებოდა თავად დონალდ ტრამპიც, რომელიც ბარაკ ობამას ხუმრობებით ნასიამოვნები არ ჩანდა.

ობამამ ასევე იხუმრა მის შესახებ გახმაურებულ ჭორებზე, რომლებიც ასევე ტრამპს უკავშირდებოდა, რომ ის ამერიკაში არ იყო დაბადებული.

მიუხედავად ვიდეოზე აღბეჭდილი ტრამპის რეაქციისა, მან შარშან განაცხადა, რომ 2011 წლის წვეულება პოზიტიურად დაამახსოვრდა.

არსებობს შეხედულება, რომ სწორედ 2011 წელს გამართულმა წვეულებამ უბიძგა ტრამპს, წასულიყო პოლიტიკაში და საპრეზიდენტო არჩევნებში მიეღო მონაწილეობა.