კიდევ ერთი მძიმე კვირა გავიდა და მოვლენათა განვითარების კუთხით, ისევ გაურკვევლობა სუფევს. ამ დროს, საქართველოს ეკონომიკაზე ზეგავლენის კუთხით, როგორც ჩანს, პროგნოზს კვლავ თიბისი კაპიტალის დროული და დაგვიანებული გადაწყვეტის სცენარები განსაზღვრავს.

თიბისი კაპიტალის მოლოდინების შესაბამისად, წინა კვირაში ლარი გამყარდა, რაც სავარაუდოდ სავალუტო ბაზრის მონაწილეთა დიდი ნაწილის შეფასებას ასახავდა იმის შესახებ, რომ ლარი ზედმეტად იყო გაუფასურებული. ამაზე მიუთითებს ეროვნული ბანკის მიერ განხორციელებული ინტერვენციაც. ახლა, როდესაც განსაკუთრებულ ვითარებაში ლარის წონასწორულ კურსზე საუბარი რთულია, თიბისი კაპიტალის სამ ფაქტორიანი ჩარჩოს მიხედვით, მართალია მხოლოდ მცირედით, თუმცა მაინც, ახლა უკვე ლარი შეფასებასთან შედარებით უფრო გამყარებული ჩანს. ასევე საყურადღებოა, რომ დეპოზიტების უფრო მეტად ვალუტაში და ამავდროულად, სესხების უფრო მეტად ლარში ფორმირების ალბათობა გაზრდილია, რასაც ე.წ. "შოკის გამაძლიერებლის" საკმაოდ ძლიერი ეფექტი აქვს.

გასულ კვირაში ეროვნული ბანკის თებერვლის ბალანსი გამოქვეყნდა და საერთაშორისო რეზერვების მცირედი კლება დაფიქსირდა. სავარაუდოდ, ამის მთავარი მიზეზი მთავრობის სავალუტო ოპერაციები იყო. თიბისი კაპიტალის შეფასებით, მომდევნო პერიოდში ამ კუთხით საპირისპირო დინამიკა უნდა ვიხილოთ, რადგან, სავარაუდოდ, ბიუჯეტის საგარეო დაფინანსება გაიზრდება.

ასევე, საქსტატმა 2021 წლის მე-4 კვარტლის პირდაპირი უცხოური ინვესტიციების შემოდინების მაჩვენებლები გამოაქვეყნა. მოლოდინების შესაბამისად, სააქციო კაპიტალის კომპონენტი სუსტი იყო, თუმცა, პირდაპირ უცხოურ ინვესტიციებთან დაკავშირებული ვალის ოდენობა მნიშვნელოვნად გაიზარდა. შემოსავლების რეინვესტირების მაჩვენებელი კი, შედარებით დაბალი დარჩა.

თიბისის მთავარი ეკონომისტის 14 მარტის ყოველკვირეულ განახლებას შეგიძლიათ გაეცნოთ ვებგვერდზე.