უკრაინის გენერალური პროკურორის, ირინა ვენედიქტოვას განცხადებით, კრემლის მთავარ პროპაგანდისტს, მარტგარიტა სიმონიანს ეჭვმიტანილის სტატუსი მიენიჭა. მისი განმარტებით, სასამართლომ გაიზიარა პროკურატურის არგუმენტები და გამართლებულად მიიჩნია, სიმონიანი დააპატიმრონ და სასამართლოში მიიყვანონ აღკვეთის ღონისძიების შესაფარდებლად.

ვენედიქტოვას თქმით, ვინაიდან რუსეთის ტერიტორიაზე ამის აღსრულება ვერ მოხერხდება, უკრაინის პროკურატურა გეგმავს, უახლოეს დღეებში დააინიციროს სიმონიანის საერთაშორისო ძებნილად გამოცხადების პროცესი. ვენედიქტოვა უხსნის სიმონიანს, რომ ასეთ შემთხვევაში, სხვა სახელმწიფოს საზღვრის გადაკვეთისას დააკავებენ უკრაინაში ექსტრადიციის მიზნით.

"მე მხოლოდ ერთი თხოვნა მაქვს თქვენთან, სხვა არა — ბრმად არ ენდოთ რუსეთის ხელისუფლების წარმომადგენლებს, რომლებიც სავარაუდოდ გირჩევენ, რომ არ ინერვიულოთ, დაიქირავეთ კარგი იურისტები, კონსულტაცია გაიარეთ. ჩვენთვის უკრაინაში ძალიან მნიშვნელოვანია ყველაფერი კანონის სულიკვეთებით იყოს", — წერს ვენედიქტოვა.

როგორც გენერალური პროკურორი ამბობს, სიმონიანს უამრავი განცხადება აქვს, რომლის გამოც უკრაინელი პროკურორების ყურადღება მიიქცია, მათ შორის ერთ-ერთია: "დედა რუსეთო, დაიბრუნე დონბასი სახლში".

"დღეს უკრაინელ პროკურორებს თქვენი იდეოლოგიური სულისკვეთებიდან გამომდინარე სურთ, დაგპატიჟონ ჩვენს სახლში", — წერ ის.

სიმონიანი ერთ-ერთი ყველაზე აქტიურია მათ შორის, ვინც პუტინის ყველა ნაბიჯს, მათ შორის ომს, ამართლებს. ის კრემლის #1 პროპაგანდის, Russia Today-ის მთავარი რედაქტორია. სიმონიანი, ისევე, როგორც ეს გამოცემა საერთაშორისო სანქციების სამიზნეები გახდნენ.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში