ტურიზმის ეროვნული ადმინისტრაციის ინფორმაციით, მიმდინარე წლის თებერვალში საქართველოში 151 870 უცხოური ვიზიტი განხორცილდა, რაც 2021 წლის იმავე თვის მონაცემს 274%-ით აღემატება, ხოლო 2020 წლის მაჩვენებელს 60,7%-ით ჩამორჩება.

უწყების ინფორმაციით, თებერვალში ყველაზე მეტი ვიზიტორი თურქეთიდან, რუსეთიდან და სომხეთიდან შემოვიდა.

ასეთია იმ ქვეყნების ჩამონათვალი, რომელთა მოქალაქეებმაც თებერვალში საქართველოში ყველაზე მეტი უცხოური ვიზიტი განახორციელეს:

  1. თურქეთი — 29 606 ვიზიტი;
  2. რუსეთი — 20 876 ვიზიტი;
  3. სომხეთი — 17 366 ვიზიტი;
  4. საქართველო (არარეზიდენტი) — 15 856 ვიზიტი;
  5. ისრაელი — 8 779 ვიზიტი;
  6. უკრაინა — 8 601 ვიზიტი;
  7. აზერბაიჯანი — 7 562 ვიზიტი;
  8. ყაზახეთი — 4 121 ვიზიტი;
  9. ბელარუსი — 3 446 ვიზიტი;
  10. ირანი — 3 272 ვიზიტი;
  11. საუდის არაბეთი — 2 728 ვიზიტი;
  12. უზბეკეთი — 2 723 ვიზიტი;
  13. პოლონეთი — 2 080 ვიზიტი;
  14. ინდოეთი — 2 017 ვიზიტი;
  15. ფილიპინები — 1 716 ვიზიტი.

ადმინისტრაციის ინფორმაციით, თებერვალში განსაკუთრებით გაიზარდა ტურისტული ვიზიტების რაოდენობა. 2022 წლის მეორე თვეში საქართველოში 137 148 საერთაშორისო ტურისტი ვიზიტი შედგა, აღდგენა 2019 წლის ანალოგიურ პერიოდთან შედარებით 55,4%-ია, ხოლო 2021 წლის თებერვალთან შედარებით ზრდამ 282% შეადგინა.

რაც შეეხება ტურიზმიდან მიღებულ შემოსავლებს, 2022 წლის თებერვალში საერთაშორისო მოგზაურობიდან საქართველომ 105 218 484 აშშ დოლარი შეადგინა, რაც 2019 წლის მაჩვენებლის 62,2%-ით აღდგენაა. 2021 წლის თებერვალთან შედარებით საერთაშორისო მოგზაურობიდან შემოსავლები 91 568 460 (670,8%) აშშ დოლარით გაიზარდა.