დისტრიბუტორთა ასოციაციის ხელმძღვანელი, ივა ჭყონია მოუწოდებს მოსახლეობას, რომ ჭარბი შესყიდვებით არც თავი დაიზიანონ და არც სხვები. მისი თქმით, ამ ეტაპზე, ბაზარზე სტაბილური ვითარებაა, თუმცა ბოლო დღეებში, სავაჭრო ქსელებში მიწოდების მხრივ შეფერხებებია, რაც მოსახელობის მხრიდან ჭარბ შესყიდვებს უკავშირდება და ხელოვნურად იწვევს დეფიციტს.

"გარკვეულ ბრენდებთან დაკავშირებული ჩავარდნები გამოწვეულია ლოგისტიკური ჯაჭვის წყვეტიდან, მაგრამ თუ დღეს გარკვეული ბრენდის ზეთი, წიწიბურა თუ შაქარი მომხმარებელს არ დახვდათ დახლზე, ეს არ ნიშნავს, რომ ორ-სამ დღეში არ იქნება, ამიტომ მოვუწოდებ მოსახლეობას, რომ ჭარბი შესყიდვებით არ დააზიანონ არც საკუთარი თავი და არც სხვა მომხმარებელი", — განაცხადა ჭყონიამ.

სოფლის მეურნეობის მინისტრი, ოთარ შამუგია ამბობს, რომ სურსათისა და პირველადი მოხმარების პროდუქციის მარაგების კუთხით არანაირი დეფიციტი არაა. ამის შესახებ მან მსხვილი სავაჭრო ქსელების და სურსათისა და პირველადი მოხმარების პროდუქციის იმპორტიორი კომპანიების წარმომადგენლებთან შეხვედრის შემდეგ განაცხადა.

სოციალურ ქსელში მომხმარებლები აქტიურად წერენ, რომ მაღაზიებში პროდუქტზე დეფიციტია. ასევე, აქვეყნებენ ფოტოებს, სადაც ჩანს, რომ დახლები ცარიელია.