იმის ფონზე, რომ რუსეთი უკრაინაში სრულმასშტაბიან ომს აწარმოებს და მშვიდობიან მოსახლეობას ბომბავს, კრემლი კონცერტებსა და გასართობ ღონსიძიებებზე უარს არ ამბობს. მარტის დასაწყისში კრემლის სახელმწიფო სასახლეში წინასარვამარტო ღონისძიებები იმართება, რომლებზეც წარმოშობით ქართველი, რუსეთში მოღვაწე მომღერლები, სოსო პავლიაშვილი, თამარა გვერდწითელი, ქეთა თოფურია და დიანა ღურწკაია იმღერებენ. ინფორმაცია ამის შესახებ აფიშის სახით საკონცერტო დარბაზის ვებგვერდზე გამოქვეყნდა.

დარბაზის აღწერიდან ვიგებთ, რომ ის ტერიტორიულად უშუალოდ კრემლში მდებარეობს და იქ გამართულ კონცერტს დიდი სოციალური მნიშვნელობა აქვს.

"მისი განსაკუთრებული სტატუსი განპირობებულია იმით, რომ იგი მდებარეობს რუსეთის ფედერაციის პრეზიდენტის რეზიდენციის ტერიტორიაზე – მოსკოვის კრემლში. ეს გულისხმობს აქ გამართული ღონისძიებების დიდ სოციალურ მნიშვნელობას", — ვკითხულობთ ვებგვერდზე.

ღურწკაია, გვერდწითელი და თოფურია კონცერტზე დღეს, 4 მარტს იმღერებენ. აფიშის მიხედვით, ღონისძიებას ჰქვია — იყავით ბედნიერები ყოველთვის და მასში მონაწილეობას იღებენ პუტინის სხვა მხარდამჭერი მომღერლები: ლევ ლეშჩენკო, ალექსანდრე მარშალი, დიმიტრი ხარატიანი, იგორ ნიკოლაევი, ლარისა დოლინა, ვლადიმერ პრესნიაკოვი და ნატალია პოდოლსკაია, ჟასმინი და მრავალი სხვა.

გარდა ამისა, 6 მარტს იმართება კიდევ ერთი კონცერტი. აფიშაზე წერია, რომ ის ტრადიციული ყოველ გაზაფხულს ტარდება და "ყველა ვარსკვლავი საყვარელისთვის" ჰქვია. აქ მონაწილებოს გვერდწითელი, პავლიაშვილი, თოფურიას სამეული, ასევე: ლევ ლეშჩენკო, ნიკოლაი ბასკოვი, ვალერი ლეონტიევი, ლარისა დოლინა, ალექსანდრე ბუინოვი, თამარა გვერდწითელი, იგორ ნიკოლაევი, ალსუ, A'Studio, Filatov&Karas, ალექსეი ვორობიოვი, ოლგა ბუზოვა, სუმისევსკი და სხვები. აფიშის მიხედვით, შესაძლოა, საკონცერტო პროგრამაში ცვლილებები შევიდეს.

აღსანიშნია, რომ დიანა ღურწკაია 2008 წელს საქართველოს სახელით ევროვიზიის მონაწილე იყო. 2019 წელს, 20 ივნისის პროტესტისას მან ბოდიში მოუხადა "ერთმორწმუნე დებსა და ძმებს, ვისი ღონისძიებაც საქართველოში ჩაიშალა". მოგვიანებით კი განაცხადა, რომ ტელევიზიით პუტინის გინების გამო საქართველოს ხელისუფლებამ ბოდიში უნდა მოიხადოს.

რაც შეეხება ქეთა თოფურიას ის ცნობილია პუტინის პოლიტიკის მხარდამჭერით და მის წინასაარჩევნო კლიპშიც აქვს მონაწილეობა მიღებული.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში