კიევის მერის, ვიტალი კლიჩკოს განცხადებით, დედაქალაქში ვითარება რთულია, ქალაქის შესასვლელთან სპეციალური ნაგებობებია აღმართული და ისინი ქალაქის დასაცავად ემზადებიან. კლიჩკო ამბობს, რომ სიტუაცია საფრთხისშემცველია და მტერს ქვეყნის გულის აღება უნდა, მაგრამ იბრძოლებენ და კიევს არ დათმობენ.

"ჩვენი მდგომარეობა რთულია. მტერი დედაქალაქის გარეუბანშია. ჩვენი შეიარაღებული ძალები, ტერორისტებთან მებრძოლები გმირულად იბრძვიან ჩვენი მიწისთვის. ვემზადებით კიევის დასაცავად, ქალაქის შესასვლელთან აღმართულია სპეციალური ნაგებობები, მოეწყო საგუშაგოები. ყველას მოვუწოდებ, შეინარჩუნონ სიმშვიდე. საჭიროების გარეშე არ გახვიდეთ გარეთ", — განაცხადა კლიჩკომ ვიდეომიმართვაში.

კლიჩკომ განმარტა, რომ ქალაქში მუშაობს კრიტიკული მნიშვნელობის ინფრასტრუქტურა და საზოგადოებრივი ტრანსპორტი. მან მხარდაჭერა გამოუცხადა სხვა დაბომბილი ქალაქების მოსახლეობას, რომლებიც მტრებს კიევთან მისვლაში აბრკოლებენ.

"სიტუაცია საფრთხისშემცველია. მტერს უნდა ჩვენი ქვეყნის გული აიღოს, მაგრამ ჩვენ ვიბრძოლებთ და კიევს არ დავთმობთ. შეიარაღებული ძალები, ანტიტერორისული დაჯგუფება, დაინტერესებული მოქალააქეები მზად არიან, რომ დაიცვან დედაქალაქი", — თქვა მან.

კლიჩკომ მოუწოდა მოსახლეობას, არ ენდონ დეზინფორმაციას, რომელიც ვრცელდება და არ აყვნენ პანიკას. მისი თქმით, ქვეყნის მომავალი ძლიერი ხალხის ხელშია, რომლებიც ახლა იბრძვიან.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში