ათასზე მეტი მწერალი, მათ შორის, რამდენიმე ნობელიანტი ავტორი, უკრაინის მხარდასაჭერ განცხადებას აკეთებს. მწერალთა საერთაშორისო ასოციაცია PEN International-ის გავრცელებულ ღია წერილში ავტორები პუტინის ქმედებებს გმობენ და უკრაინელ კოლეგებს სოლიდარობას უცხადებენ.

"ჩვენ, მწერლები მთელი მსოფლიოდან, შეძრწუნებულები ვართ იმ ძალადობით, რომელიც რუსულმა ძალებმა უკრაინისკენ მიმართეს. მოვუწოდებთ, დაუყოვნებლივ დასრულდეს ეს სისხლისღვრა. ჩვენ ერთხმად ვგმობთ უაზრო ომს, რომელიც პრეზიდენტმა პუტინმა მხოლოდ იმიტომ წამოიწყო, რომ ვერ ეგუება უკრაინელი ხალხის უფლებას, საკუთარი მომავალი და ისტორია მოსკოვის ჩარევის გარეშე განიხილოს. ჩვენ ერთხმად ვუჭერთ მხარს უკრაინაში მყოფ მწერლებს, ჟურნალისტებს, ხელოვანებს და ყველა ადამიანს, ვინც ახლა თავისი ცხოვრების ყველაზე საშინელ წუთებს გადის. ჩვენ თქვენ გვერდით ვდგავართ და თქვენი ტკივილის თანამოზიარე ვართ. ყველა ადამიანს აქვს მშვიდობიანად ცხოვრების, გამოხატვის თავისუფლებისა და თავისუფალი შეკრების უფლება. პუტინის ომი კი არის თავდასხმა დემოკრატიასა და თავისუფლებაზე არა მხოლოდ უკრაინაში, არამედ მთელ მსოფლიოში. ჩვენ ერთხმად მოვუწოდებთ ყველას მშვიდობისკენ და იმ პროპაგანდის დასრულებისკენ, რომელიც ძალადობას ახალისებს. თავისუფალი და დამოუკიდებელი უკრაინის გარეშე არ არსებობს თავისუფალი და უსაფრთხო ევროპა. მშვიდობამ უნდა გაიმარჯვოს".

განცხადებას ხელს მსოფლიოს სხვადასხვა ქვეყნის ასობით მწერალი აწერს. მათ შორის არიან ნობელიანტი სვეტლანა ალექსიევიჩი, მარგარეტ ეტვუდი, პოლ ოსტერი, ენტონი დოერი, ჯონათან ფრენზენი, ნობელიანტი ორჰან ფამუქი, სალმან რუშდი, ელიფ შაფაქი და ასევე ნობელიანტი ოლგა ტოკარჩუკი.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში