24 თებერვალს რუსეთი უკრაინაში შეიჭრა და ომი დაიწყო. რუსეთის აგრესიამ მსოფლიო აალაპარაკა და ომს სხვადასხვა ქვეყნის ლიდერისა თუ ორგანიზაციების წარმომადგენლების გარდა სხვა ცნობილი ადამიანებიც გამოეხმაურნენ. მათ შორისაა მსახიობი და პოლიტიკოსი არნოლდ შვარცენეგერი.

არნოლდ შვარცენეგერმა ტვიტერზე უკრაინის მხარდასაჭერად რამდენიმე განცხადება გააკეთა. მისი თქმით, ინტერვიუ რამდენჯერმე სთხოვეს, თუმცა ფიქრობს, რომ ახალი ამბები უშუალოდ უკრაინაში მიმდინარე მოვლენებზე უნდა იყოს კონცენტრირებული — "იმ ტრაგედიაზე, რომელმაც ყველას გული გაგვიტეხა და უკრაინელი ხალხის სიმამაცეზე, რომელიც ასე აღგვაფრთოვანებს".

შვარცენეგერმა რამდენიმე ტვიტით ომის საშინელებაზე ისაუბრა და მიმდინარე მოვლენები დაგმო:

"უცხოური პოლიტიკის ექსპერტი არ ვარ, ამიტომ ანალიზს ჩემზე ჭკვიან ხალხს მივანდობ. ის კი ვიცი, თუ რას ნიშნავს ომის შემდეგ ოკუპირებულ ქვეყანაში გაზრდა და ისიც, რომ ომში და მის შემდეგ გამარჯვებული არ არსებობს. ყველა იტანჯება... მყავს უკრაინელი და რუსი მეგობრები და ფანები. არც ერთ მათგანს არ უნდა ომი", — წერს შვარცენეგერი.

ომის დაგმობის პარალელურად შვარცენეგერმა უკრაინას მხარდაჭერა გამოუცხადა და უკრაინელი ხალხი სიმამაცისთვის შეაქო:

"დღეს უკრაინელი ხალხის გვერდით ვდგავარ. ვიზიარებ თქვენს მწუხარებასა და მშვიდობის იმედს. აღფრთოვანებული ვარ იმ სიმამაცითა და ჰუმანურობით, რომელსაც ამ კოშმარის დროს ინარჩუნებთ. ღმერთმა დაგლოცოთ", — ვკითხულობთ შვარცენეგერის განცხადებაში.

ამავე თემაზე:

რუსეთმა ომი დაიწყო, რა ხდება უკრაინაში — განახლებადი