კანადამ სანქციების ახალი პაკეტი გამოაქვეყნა. სანქციები შეეხება 62 ფიზიკურ და იურიდიულ პირს, რომელთა შორის ელიტისა და მსხვილი ბანკების წევრები არიან. კანადის პრემიერმინისტრის, ჯასტინ ტრუდოს განცხადებით, უკრაინაზე რუსეთის თავდასხმის შემდეგ ყველა საექსპორტო ნებართვა გააუქმეს.

"დღეს, რუსეთის უგუნური და საშიში სამხედრო დარტყმის ფონზე, ჩვენ ვაწესებთ შემდგომ, მკაცრ სანქციებს.

ეს სანქციები ფართომასშტაბიანია. ისინი სერიოზულ ხარჯებს დააკისრებენ თანამონაწილე რუსულ ელიტას და შეზღუდავენ პრეზიდენტ პუტინის შესაძლებლობას, განაგრძოს ამ გაუმართლებელი შემოჭრის დაფინანსება", — თქვა ტრუდომ.

სანქციების ახალი პაკეტი შეიმუშავა აშშ-მ და დიდმა ბრიტანეთმაც.

გასული 24 საათის მთავარი ამბებია:

  • პუტინი უკრაინაში შეიჭრა და ომი დაიწყო;
  • რუსულმა ჯარებმა უკრაინას სხვადასხვა ტერიტორიიდან, მათ შორის ბელარუსიდან შეუტიეს, რასაც ლუკაშენკო უარყოფს;
  • თავდასხმა სხვადასხვა ქალაქსა და რეგიონში, მათ შორის, კიევის ოლქშიც მოხდა;
  • რუსებმა კონტროლი დაამყარეს რამდენიმე აეროდრომსა და აეროპორტზე;
  • რუსებმა ხელში ჩაიგდეს ჩერნობილის ატომური სადგური;
  • ევროკავშირმა, ბრიტანეთმა, აშშ-მ და კანადამ რუსეთს ახალი სანქციები დაუწესეს;
  • უკრაინაში კომენდანტის საათი და საომარი მდგომარეობა გამოცხადდა;
  • უკრაინამ რუსეთთან დიპლომატიურ ურთიერთობები გაწყვიტა;
  • ომის გასაპროტესტებლად აქციები მსოფლიოს სხვადასხვა ქალაქში, მათ შორის, მოსკოვში გაიმართა, სადაც ასეულობით ადამიანი დააკავეს;
  • ორივე მხარეს დაიღუპა ათეულობით სამხედრო, ზუსტი რაოდენობა უცნობია;
  • რუსული რუბლი რეკორდულად გაუფასურდა;
  • რუსეთის თავდასხმის შედეგად 57 უკრაინელი გარდაიცვალა, 169 დაიჭრა.

რუსეთმა ომი დაიწყო, რა ხდება უკრაინაში — განახლებადი