გამოცემა Associated Press წყაროზე დაყრდნობით წერს, რომ 2021/2022 UEFA-ს ჩემპიონთა ლიგის ფინალი სანკტ-პეტერბურგში აღარ გაიმართება.

UEFA-მ საგანგებო შეხვედრა 25 თებერვალს ჩანიშნა. მათი განცხადებით, შეხვედრაზე შეაფასებენ მიმდინარე მოვლენებს და მიიღებენ გადაწყვეტილებას.

"რუსეთსა და უკრაინას შორის ბოლო 24 საათის განმავლობაში ვითარების განვითარების შემდეგ, უეფას პრეზიდენტმა გადაწყვიტა, მოიწვიოს აღმასრულებელი კომიტეტის რიგგარეშე სხდომა პარასკევს, 25 თებერვალს, ცენტრალური დროით 10:00 საათზე, რათა შეფასდეს სიტუაცია და მიიღოს ყველა საჭირო. გადაწყვეტილებები. შემდგომი კომუნიკაცია უეფას აღმასრულებელი კომიტეტის სხდომის შემდეგ მოხდება", — ვკითხულობთ განცხადებაში.

ჩემპიონთა ლიგის ფინალი წელს, 28 მაისს სანქტ-პეტერბურგში იყო დაგეგმილი.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევი. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

სიტუაცია მუდმივად იცვლება. ამ ეტაპზე არსებული ინფორმაციით, დანაკარგები არის ორივე მხარეს. მაგალითად, უკრაინული შეიარაღებული ძალების გენერალური შტაბის ინფორმაციით, ქალაქ ხარკოვის შემოვლით გზაზე 4 ტანკი დაიწვა, განადგურდა 6 თვითმფრინავი, 2 ვერტმფრენი და დაიღუპა 50-მდე რუსი სამხედრო. უკრაინის პრეზიდენტის ადმინისტრაციაში აცხადებენ, რომ 24 თებერვლის ღამეს 40-ზე მეტი უკრაინელი სამხედრო პირი დაიღუპა. გარდა ამისა, რუსებმა ხარკოვის ოლქში საცხოვრებელი კორპუსი დაბომბეს, დაიღუპა ერთი არასრულწლოვანი.

უკრაინის თავდაცვის მინისტრმა, ალექსეი რეზნიკოვმა მოუწოდა მოქალაქეებს, ვინც მზადაა და იცის იარაღის გამოყენება, ახლავე შეუერთდეს შეიარაღებულ ძალებს. ზელენსკიმ კი განაცხადა, რომ მისცემენ იარაღს ყველას, ვისაც ქვეყნის დაცვა სურს.

უკრაინამ რუსეთთან დიპლომატიური ურთიერთობა გაწყვიტა. პარტნიორი ქვეყნების უმეტესობამ დაგმო რუსეთის აგრესიული ქმედებები. დაგეგმილია G7-ის, ნატოს და გაეროს საგანგებო სხდომები.

გაიგეთ მეტი: