მას შემდეგ, რაც 24 თებერვალს რუსეთმა უკრაინის წინააღმდეგ სრულმასშტაბიანი ომი დაიწყო, შექმნილ სიტუაციას არაერთი ცნობილი ადამიანი გამოეხმაურა და პუტინის ქმედებები დაგმო. მათ შორის რუსი საზოგადო მოღვაწეებიც არიან.

1. სტივენ კინგი, ამერიკელი მწერალი

"უმეტესობა ჩვენგანმა ბავშვობაში, სათამაშო მოედანზე, ერთი რამ ვისწავლეთ: განზე არ უნდა დადგე, როცა დიდი ტიპი პატარას სცემს. შეიძლება მის შესაჩერებლად ერთი-ორი მუშტიც დაგჭირდეს, მაგრამ ეს გამართლებულია".

2. Cardi B, ამერიკელი რეპერი

"ნეტავ, მსოფლიო ლიდერები ძალაუფლებისკენ სწრაფვას შეეშვან და მათზე (მოქალაქეებზე) იფიქრონ, ვისზეც ეს გავლენას ახდენს — ამას გარდა, მთელი მსოფლიო კრიზისში ექცევა. ომი, სანქციები და სხვა ქვეყანაში შეჭრა ლიდერების უკანასკნელი სადარდებელი უნდა იყოს".

3. ენი ლენოქსი, შოტლანდიელი მომღერალი

"რა სახის 'საფასური' უნდა ზღოს ჩვეულებრივმა ხალხმა კოშმარული უგუნურებისთვის და 'შეჭრისა' და 'საომარი სიტუაციის' სისასტიკისთვის? დაბადებიდან — მეორე მსოფლიო ომის დასრულებიდან ათწლეულის შემდეგ — ჯამში, 67 წელი, 'მშვიდობიან' გარემოში ცხოვრება მხვდა წილად. ამას სათანადოდ ვაფასებ და, შესაბამისად, 'ომის' ცნებას მიუღებელ, საძაგელ სისასტიკედ მივიჩნევ".

4. დმიტრი გლუხოვსკი, რუსი მწერალი

მეტროს ტრილოგიის ავტორმა, რომელსაც პუტინის პოლიტიკის წინააღმდეგ აქამდეც არაერთხელ გაულაშქრია, ტვიტერზე უკრაინის დროშის ფოტო გამოაქვეყნა და [ლიდერებს] მოუწოდა, შეწყვიტონ უკრაინული ქალაქების დაბომბვა და დაუყოვნებლივ გამოიყვანონ საოკუპაციო ჯარები ქვეყნიდან.

"ეს მტაცებლური, ძმათამკვლელი ომია, რომელიც შეშლილმა ტირანმა წამოიწყო და რომელსაც გამართლება არ აქვს. სირცხვილი. გვაპატიე, უკრაინა", — წერს გლუხოვსკი.

5. მანიჟა, რუსი მომღერალი

წარმოშობით ტაჯიკმა მომღერალმა, რომელმაც რუსეთი 2021 წლის ევროვიზიაზე წარადგინა, ინსტაგრამზე შავი კვადრატის გამოქვეყნებით გააკეთა განცხადება.

"ეს ის დილაა, როცა გაღვიძებას ნანობ. არ იცი, სად წახვიდე, ვის დაეხმარო. საწოლის კიდეზე ვზივარ და ვტირი. ვტირი, რადგან ეს ჩემი არჩევანი არაა. ეს აგრესია ეწინააღმდეგება ჩემი, ჩემი ოჯახისა და, ჩემი რწმენით, ჩვენი ხალხის ნებასაც. ჩემს ოჯახში უკრაინელებიც არიან. ჩემი მომავალი ქმარი ნახევრად უკრაინელია. ჩემი მეგობრები უკრაინელები არიან. რუსეთი და უკრაინა მხოლოდ ორი ქვეყანა არაა. ჩვენ ნათესავები ვართ. ჩვენ შორის ნებისმიერი ომი ძმათამკვლელია. თუმცა, ახლა განსაკუთრებული სიფრთხილე გვმართებს. პანიკას და ინფორმაციით მანიპულირებას ნუ მიეცემით. ნებისმიერი არასწორი ნაბიჯი ან სიტყვა ახლა სასიკვდილო შეიძლება აღმოჩნდეს", — წერს მომღერალი, რომელმაც გასულ წელს ფემინისტური განცხადებებისა და ლგბტქ თემის მხარდაჭერისთვის რუსი მოქალაქეებისა და პოლიტიკოსებისგან კრიტიკა და მუქარა მიიღო.

6. ბორის აკუნინი, რუსი მწერალი

წარმოშობით ქართველმა ავტორმა განაცხადა, რომ "ბოლომდე არ ეჯერა, თუკი პუტინი ამ აბსურდულ ომს წამოიწყებდა".

"ვცდებოდი", — აგრძელებს აკუნინი, — "მეგონა, საბოლოოდ, გონიერება გაიმარჯვებდა, მაგრამ შევმცდარვარ. უგუნურებამ მოიგო. ხალხი იხოცება, სისხლი იღვრება. რუსეთს ფსიქიკურად გაუწონასწორებელი დიქტატორი მართავს და საშინელება ისაა, რომ იგი თავის პარანოიას მორჩილად მიჰყვება. მე ვიცი, რომ პუტინეთი და რუსეთი ერთი და იგივე არ არის, თუმცა, მთელი მსოფლიოსთვის ახლა სხვაობა აღარ არსებობს. უკრაინელებისთვის საშინელებაა. გონიერი რუსებისთვის, რომლებიც მანიაკის ხელისუფლების ქვეშ ცხოვრობენ, საშიშია. საშიშია იმ სულელი რუსებისთვისაც, ვინც ახლა იცინის. 2022 წლის 24 თებერვალი ყოველი ჩვენგანისთვის ახალი ეპოქის დასაწყისია. საშიშია. რამდენი ხანი გაგრძელდება და რამდენი მსხვერპლი მოჰყვება მას?".

ასევე იხილეთ:

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

სიტუაცია მუდმივად იცვლება. ამ ეტაპზე არსებული ინფორმაციით, დანაკარგები არის ორივე მხარეს. მაგალითად, უკრაინული შეიარაღებული ძალების გენერალური შტაბის ინფორმაციით, ქალაქ ხარკოვის შემოვლით გზაზე 4 ტანკი დაიწვა, განადგურდა 6 თვითმფრინავი, 2 ვერტმფრენი და დაიღუპა 50-მდე რუსი სამხედრო. უკრაინის პრეზიდენტის ადმინისტრაციაში აცხადებენ, რომ 24 თებერვლის ღამეს 40-ზე მეტი უკრაინელი სამხედრო პირი დაიღუპა. გარდა ამისა, რუსებმა ხარკოვის ოლქში საცხოვრებელი კორპუსი დაბომბეს, დაიღუპა ერთი არასრულწლოვანი.

უკრაინის თავდაცვის მინისტრმა, ალექსეი რეზნიკოვმა მოუწოდა მოქალაქეებს, ვინც მზადაა და იცის იარაღის გამოყენება, ახლავე შეუერთდეს შეიარაღებულ ძალებს. ზელენსკიმ კი განაცხადა, რომ მისცემენ იარაღს ყველას, ვისაც ქვეყნის დაცვა სურს.

უკრაინამ რუსეთთან დიპლომატიური ურთიერთობა გაწყვიტა. პარტნიორი ქვეყნების უმეტესობამ დაგმო რუსეთის აგრესიული ქმედებები. დაგეგმილია G7-ის, ნატოს და გაეროს საგანგებო სხდომები.

გაიგეთ მეტი: