დე ფაქტო პრეზიდენტმა, ანატოლი ბიბილოვმა უკრაინაში რუსეთის შეჭრის ფონზე ოკუპირებული ცხინვალში "სამხედრო განგაში" გამოაცხადა. მან მოუწოდა ე.წ. სამსახურებს შეასრულონ ყველა ბრძანება, რომელსაც რუსეთის თავდაცვის სამინისტრო გასცემს და აკონტროლონ ე.წ. საზღვარი საქართველოსთან. მისივე თქმით, მზად უნდა იყვნენ უპასუხონ "ყველა პროვოკაციას", რომელიც მოსალოდნელია ქართული მხრიდან.

ბიბილოვმა დე ფაქტო უსაფრთხოების საბჭოს საგანგებო სხდომა მოიწვია, სადაც განაცხადა, რომ რუსეთის მიერ უკრაინის ოკუპირებული ტერიტორიების აღიარებამ გამოიწვია ისეთი ძალების გააქტიურება, რომლის უპასუხოდ დატოვება რუსეთს "არ შეეძლო".

"რუსეთის ფედერაციის უსაფრთხოებისა და დონეცკისა და ლუგანსკის სახალხო რესპუბლიკების მოქალაქეების უსაფრთხოების უზრუნველსაყოფად მიღებულ იქნა გადაწყვეტილება სპეცოპერაციის ჩატარების შესახებ. ამასთან დაკავშირებით ვლადიმერ ვლადიმროვიჩ პუტინმა აღნიშნა, რომ არის ქვეყნები, რომლებიც შეიძლება ჩაერთონ ამ პროცესებში, ანუ გარე ძალები. უნდა გვესმოდეს, რომ საქართველოც გარე ძალებს ეკუთვნის", — განაცხადა მან.

ბიბილოვი ამბობს, რომ ამ მოვლენების გათვალისწინებით საჭირო ნაბიჯები გადადგა. კერძოდ, შექმნა ოპერატიული შტაბი, რომელშიც სხვადასხვა ე.წ. სამინისტრო და დე ფაქტო უწყება გაერთიანდა. მისი დავალებით, ე.წ. შინაგან საქმეთა სამინისტრომ უნდა გამოაცხადოს განგაში სრულ შემადგენლობაზე. პერსონალი იყოს ყაზარმულ სიტუაციაში და მზად ნებისმიერი ბრძანების შესასრულებლად.

"7:30-ზე თავდაცვის მინისტრს სამხედრო განგაში გამოვაცხადებინე. სამინისტროს ყველა დანაყოფი უნდა იყოს ყაზარმულ მდგომარეობაში და მზად იყოს კონცენტრაციის ზონებში წასვლისთვის. დაორგანიზდეს სრული თანამშრომლობა რუსულ სამხედრო ბაზასთან. ამოცანები, რომლებიც წამოვა რუსეთის ფედერაციის თავდაცვის სამინისტროს ხაზიდან, ასევე ეხება სამხრეთ ოსეთის რესპუბლიკის თავდაცვის სამინისტროს. [...]

სახელმწიფო უშიშროების კომიტეტმა უნდა მოახდინოს კონტრდაზვერვის მობილიზება და სამხრეთ ოსეთის რესპუბლიკაში რუსეთის ფედერაციის FSB-ს სასაზღვრო წარმომადგენლებთან ერთად უზრუნველყოს ყველა საჭირო ქმედება საზღვრის და საქართველოს მიმდებარე ტერიტორიების მონიტორინგისთვის. უზრუნველყოს მზადყოფნა, უპასუხოს ყველა პროვოკაციას, რომელიც შეიძლება იყოს საქართველოდან", — წერია ბიბილოვის განცხადებაში.