ბალტიის ქვეყნების, ლიეტუვას, ლატვიისა, ესტონეთის საგარეო საქმეთა მინისტრები უკრაინის მხარდამჭერ ერთობლივ განცხადებას ავრცელებენ. მათი თქმით, სასწრაფოდაა საჭირო, რომ უკრაინა საბრძოლო მასალითა და ყველა შესაძლო სამხედრო დახმარებით მოამარაგონ.

მინისტრები გმობენ რუსეთის ღია, ფართომასშტაბიან აგრესიას დამოუკიდებელი, მშვიდობიანი და დემოკრატიული უკრაინის წინააღმდეგ. მათი შეფასებით, ეს ყველა საერთაშორისო ნორმისა და სამართლის აშკარა დარღვევაა.

"საერთაშორისო საზოგადოებამ რუსეთს უნდა დაუწესოს ყველაზე მკაცრი სანქციები, მათ შორის, გამოვთიშოთ SWIFT-დან, მოვახდინოთ მისი პოლიტიკური იზოლაცია და მტკიცე დავუჭიროთ მხარი დამოუკიდებელი უკრაინის სუვერენიტეტსა და ტერიტორიულ მთლიანობას. ჩვენ სასწრაფოდ უნდა მოვამარაგოთ უკრაინელი ხალხი იარაღით, საბრძოლო მასალისა და ნებისმიერი შესაძლო სამხედრო დახმარებით. ასევე ეკონომიკური, ფინანსური და პოლიტიკური დახმარებით და ჰუმანიტარული მხარდაჭერით. ამ რთულ მომენტში ჩვენ კრაინელ ხალხთან ვდგავართ. ძვირფასო უკრაინელ მეგობრებო, ჩვენ თქვენს ისტორიულ დედაქალაქ კიევში ვართ, მხარს გიჭერთ და ყველაფერს ვაკეთებთ, რათა აგრესორმა გადაიხადოს უმაღლესი ფასი. თავისუფლება უკრაინას!" — ნათქვამია განცხადებაში.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

გაიგეთ მეტი: