თუ გეგონათ, რომ კარდაშიან-ჯენერების ოჯახური დრამების გარეშე ცხოვრებას მშვიდად გააგრძელებდით, შეცდით — 14 აპრილს მსოფლიოს ყველაზე ცნობილი ოჯახი ახალი შოუთი, სახელად The Kardashians ბრუნდება. ცოტა ხნის წინ გადაცემის პირველი ოფიციალური ტრეილერი გავრცელდა, რომელშიც შოუს ნაწყვეტების ნახვაც შეგიძლიათ.

"გჯერათ, რომ ეს პირველი დღეა?" — ეკითხება ტრეილერის დასაწყისში კიმ კარდაშიანი ოჯახის სხვა წევრებს. ტრეილერში კიმის Saturday Night Live-ისთვის მომზადების მომენტი და კორტნისა და ტრევის ბარკერის ნიშნობაც ჩანს.

ტრეილერში ნახსენები არაა კორტნი კარდაშიანის 3 შვილის მამა სკოტ დისიკი და კიმ კარდაშიანის ყოფილი ქმარი კანიე ვესტი, რომლის პოსტებმაც სოციალურ ქსელში მთელი სამყაროს ყურადღება მიიპყრო.

მსოფლიოს ერთ-ერთი ყველაზე ცნობილი ოჯახის შესახებ გადაღებული პოპულარული რეალითი შოუ, Keeping Up With the Kardashians, 20 სეზონის შემდეგ, 2021 წელს დასრულდა. ამ ამბიდან სულ რამდენიმე თვეში კი დადასტურდა, რომ კარდაშიანები ახალი შოუთი დაბრუნდებოდნენ.

ახალი გადაცემა კვლავაც კარდაშიან-ჯენერების ოჯახის ხუთი წევრის — კრისის, კორტნის, კიმის, ქლოის, კენდალისა და კაილის — ასევე მათ გარშემო მყოფი სხვა ადამიანების ცხოვრების შესახებ იქნება. დრამებით, დაუჯერებელი ისტორიებითა და სახალისო მომენტებით გაჯერებული გადაცემის პოპულარობა ეკრანზე გატარებული 14 წლის განმავლობაში მხოლოდ იზრდებოდა, კარდაშიანები კი ახალი შოუთიც იმავეს გამეორებას აპირებენ.