რუსეთსა და უკრანას შორის კრიზისის გამწვავების შემდეგ ნავთობის ფასი გაიზარდა. როგორც ცნობილია, გუშინ, 21 თებერვალს პუტინმა დონეცკისა და ლუგანსკის ოლქები "დამოუკიდებელ რესპუბლიკებად" აღიარა.

სამშაბათის დილის ვაჭრობის შედეგად, აზიაში ნედლი ნავთობის ფასი 3,22%-ით გაიზარდა და ბარელზე 94 დოლარი შეადგინა. იმავდროულად, 1,5%-ით გაიზარდა Brent ტიპის ნავთობის ფასი და ბარელზე 96,82 დოლარი გახდა. ჯამში ნედლი ნავთობის ფასი მიმდინარე წლის დასაწყისთან შედარებით დაახლოებით 25%-ით არის გაზრდილი.

ნავთობის ფასების მიმდინარე ზრდა მსოფლიოში არსებულ დაძაბულ ვითარებას უკავშირდება. ექსპერტების შეფასებით მიმდინარე გეოპოლიტიკურმა დაძაბულობამ ნავთობის ფასი 10 დან 15 დოლარამდე გაზარდა. აღსანიშნავია, რომ გასულ წელს რუსეთი ევროკავშირისთვის ბუნებრივი აირისა და ნავთიბუს უმსხვილესი მიმწოდებელი იყო — მიმდინარე დაძაბულობა კი, ნათობის ფასზე მნიშვნელოვან წნეხს ახდენს.

Lipow Oil Associates-ის პრეზიდენტის, ენდი ლიპოუს თქმით, კრიზისის გაუარესების შემთხვევაში ნავთობის ფასი შეიძლება გაიზარდოს ბარელზე 110 დოლარამდე. ლიპოუ ამბობს, რომ ბაზრები დააკვირდებიან საუდის არაბეთს, გაერთიანებულ საემიროებს და ქუვეითს — არსებობს მოლოდინი, რომ ეს ქვეყნები წარმოების დამატებით სიმძლავრეებს გამოიყენებენ. ლიპოუს შეფასებით, ამ ქვეყნებში დღეში დამატებით 3,5 მილიონიდან 4 მილიონამდე ბარელის წარმოება შეუძლიათ.

გუშინ, 21 თებერვალს, პუტინის მიმართვისას, როდესაც მან რუსეთის მხრიდან დონეცკისა და ლუგანსკის "დამოუკიდებელ რესპუბლიკებად" აღიარების შესახებ განაცხადა, რუბლი დოლართან და ევროსთან მიმართებით გაუფასურდა. ამჟამად ერთი დოლარი 80,07 რუბლად, ხოლო ერთი ევრო 90,7 რუბლად ივაჭრება.

ჯერ კიდევ პუტინის მიმართვამდე რუსული კომპანიების აქციები ბოლო რვა წლის განმავლობაში ყველაზე მეტად შემცირდა. ბლუმბერგის ინფორმაციით, მოსკოვის საფონდო ბირჟის ინდექსი (MOEX Russia Index) 11%-ით დაეცა, რაც 2014 წლის შემდეგ ყველაზე დიდი ვარდნაა. დღის განმავლობაში ინდექსის 14%-იანი ვარდნაც დაფიქსირდა, რაც 2008 წლის ნოემბრის შემდეგ ყველაზე ცუდი შედეგია.

ბოლო ცნობების მიხედვით, უკრაინის გაერთიანებული ძალების საოპერაციო შტაბის ინფორმაციით, რუსეთის მხრიდან დაბომბვის შედეგად ორი უკრაინელი ჯარისკაცი დაიღუპა, 12-მა სხვადასხვა სიმძიმის დაზიანება მიიღო. დაჭრილი ჯარისკაცები სამედიცინო დაწესებულებაში გადაიყვანეს.

უწყების განცხადებით, 21 თებერვალს რუსეთის მხრიდან ცეცხლის შეწყვეტის შეთანხმების დარღვევის 84 შემთხვევა დაფიქსირდა, აქედან 64 შემთხვევაში მინსკის შეთანხმებით აკრძალული იარაღი იყო გამოყენებული.