ჩინეთში Friends-ის განსაკუთრებული პოპულარობის გამო რამდენიმე გასართობმა პლატფორმამ, მათ შორის Tencent-მა, სერიალის პირველი სეზონის ჩვენება დაიწყო.

Friends-ის ჩინელმა ფანებმა, რომლებსაც სერიალი აქამდეც უნახავთ, შენიშნეს, რომ გასართობ პლატფორმებზე განთავსებული შოუდან გეი პერსონაჟების სცენები ამოღებულია. სერიალიდან მთლიანად წაშლილია ის ეპიზოდი, რომელშიც როსი თავისი ყოფილი ცოლის შესახებ ამბობს, რომ ის ლესბოსელია. ზოგიერთმა მაყურებელმა კი ისიც შენიშნა, რომ LGBTQ+ პერსონაჟების ფრაზები თარგმნისას შეცვლილია, განსაკუთრებით კი ის დიალოგები, რომლებიც სტრიპტიზ კლუბსა და ორგაზმს ეხება.

ფოტო: NBC

ამ ფაქტს Weibo-ზე Friends-ის მილიონობით ფანი გამოეხმაურა. "დღეს ჩინეთში არა მხოლოდ Friends-ის მსგავსი სატელევიზიო შოუ არ არსებობს, რომელშიც გეი პერსონაჟები მონაწილეობენ და სხვა სცენებთან ერთად მათ ისტორიებსაც ვისმენთ, არამედ უცხოური სერიალებიდანაც კი იკრძალება ასეთი შინაარსის ჩვენება. არ მესმის, რატომ ამოჭრეს გეი პერსონაჟების სცენები. შოუში მოქმედება 30 წლის წინ ვითარდება, ჩვენ კი განვითარების მხრივ, ახლა ამაზე უკან მივდივართ", — წერს ერთ-ერთი ფანი.

ჩინეთში პირველად 2016 წელს შემოიღეს კანონი, რომელიც ტელევიზიაში LGBTQ+ და ქორწინების გარეშე ურთიერთობაში მყოფი ადამიანების გამოჩენას კრძალავს. რაც შეეხება LGBTQ+ გამოცემებს, ვებგვერდებს თუ ამ თემასთან დაკავშირებულ ჯგუფებს, ყველა მათგანი გაუქმდა.

ფოტო: 20th Century Fox

გასული თვის დასაწყისში პლატფორმა Tencent-ზე Fight Club განსხვავებული ფინალით განათავსეს. როგორც ფილმის ერთ-ერთი მაყურებელი ამბობს, ჩინური ვერსიის მიხედვით, Fight Club-ში "ყველაფერი ძალიან სწრაფად გაირკვა და პოლიციამ ყველა დამნაშავე დააკავა". 2019 წელს გადაღებული Bohemian Rhapsody-დან კი რამდენიმე სცენა ამოჭრეს, სანამ ფილმი ჩინეთის კინოთეატრებში გამოვიდოდა.

ასევე იხილეთ: