Star Wars Land დისნეის ის პროექტია, რომელსაც ლეგენდარული კოსმოსური საგის ფანები მოუთმენლად ელიან. ეს იდეა პირველად 2015 წელს დისნეის აღმასრულებელმა დირექტორმა ბობ იგერმა გააცნო საზოგადოებას და მას შემდეგ პროექტზე ბევრი არაფერი იყო ცნობილი.

ვარსკვლავური ომების ფანებმა მხოლოდ ის ვიცოდით, რომ სულ მალე, დისნეის თემატურ პარკებს ახალი მხარე შეემატებოდა, რომელიც მთლიანად შორს, ძალიან შორს მდებარე გალაქტიკას მიეძღვნებოდა.

მართალია, პარკი 2019 წელს გაიხსნება და ის ჩვენგან ძალიან შორს იქნება, მაგრამ ვისაც გაუმართლებს და იქ მოხვდება, სასწაული სანახაობის მოწმეც გახდება.

როგორც Star Wars Celebration ღონისძიებისას დისნეის წარმომადგენლებმა განაცხადეს, პარკში ფილმში ნანახ ლოკაციებს ვერ ვნახავთ, მაგრამ იქ ბევრი ნაცნობი ელემენტი დაგვხვდება.

"ჩვენ გვინდა ვარსკვლავური ომების ახალი ისტორიის შექმნა, ეს იქნება ახალი პლანეტა, ახალი ხალხით და ახალი ისტორიით," განაცხადა დისნეის კრეატიულმა აღმასრულებელმა სკოტ ტროუბრიჯმა.

ფოტო: Disney

მიუხედავად ამ სიახლისა, ახალ თემატურ პარკში ნაცნობ პერსონაჟებს აუცილებლად შეხვდებით, აქ იქნებიან ჩვენი საყვარელი ანდროიდები, BB-8, R2-D2; აქვე შეგეძლებათ იფრინოთ Millenium Falcon-ით და სხვა მსგავსი ატრაქციონებით გართობა.