აშშ-ის თქმით, რუსეთი იტყუება, როცა ამბობს, რომ უკრაინიდან ძალები გაიწვია. "პირიქით, ბოლო დღეებში საზღვართან დამატებით 7 000 ჯარისკაცი განლაგდა", — განუცხადა ბაიდენის ადმინისტრაციის მაღალჩინოსანმა ჟურნალისტებს ოთხშაბათს, 16 თებერვალს.

რატომ არის ეს მნიშვნელოვანი: ამ მტკიცების თანახმად, ვლადიმერ პუტინი საჯაროდ შეთანხმებებზე საუბრობს, სინამდვილეში კი ჩუმად ემზადება ომისთვის.

• ამ მოსაზრებას სატელიტით გადაღებული სურათებიც ამყარებს.

რა ითქვა: "გუშინ რუსეთის ხელისუფლებამ განაცხადა, რომ ჯარებს უკან იწვევს. ამ განცხადებას საკმაოდ დიდი გამოხმაურება მოჰყვა და ახლა უკვე ვიცით, რომ ეს ტყუილია", — განაცხადა ადმინისტრაციის წარმომადგენელმა, რომელიც ანონიმურობის დაცვის პირობით დათანხმდა კომენტარზე.

• "რუსეთმა თქვა, რომ მზადაა დიპლომატიურ საუბარში ჩაერთოს, როგორც მას ჩვენი მხარე და მოკავშირეები სთავაზობდნენ, თუმცა უკვე ვხედავთ, რომ სინამდვილეში ომისთვის მობილიზება არ შეჩერებულა".

რა შეიძლება მოხდეს: მაღალჩინოსანმა დაამატა ისიც, რომ რუსეთმა შეიძლება ანექსიის დასაწყებად საბაბი გამოიყენოს, მათ შორის, გააყალბოს ცნობები რუსეთის მიერ მხარდაჭერილი სეპარატისტების მიმართ თავდასხმაზე დონბასის რეგიონში.

• "ჩვენ არაერთხელ გვინახავს ყალბი ცნობები რუსების მხრიდან, მათ შორის, "თავდასხმები მშვიდობიან მოქალაქეებზე", მტკიცებები იმასთან დაკავშირებით, რომ აშშ და უკრაინა ბიოლოგიურ და ქიმიურ იარაღებს ქმნიან და ბრალდებები, რომ დასავლეთი ადგილობრივების დასახოცად ჯგუფებს აყალიბებს".
• "ეს ცნობები კატეგორიულად მცდარია და მსგავსი განცხადებები მომავალ დღეებში მხოლოდ მოიმატებს"

რა იგულისხმება: ამ განცხადებებით, ბაიდენის ადმინისტრაცია ფაქტობრივად საინფორმაციო ომს იწყებს რუსეთის მიმართ და პუტინის სავარაუდო ნაბიჯებს პრევენციის მიზნით ასაჯაროებს.

• ამ შემთხვევაში დაზვერვის ცნობებს იმისთვის კი არ ვიყენებთ, რომ ომი დავიწყოთ, როგორც წარსულში მომხდარა, არამედ იმისთვის, რომ ომი შევაჩეროთ, — განაცხადა თეთრი სახლის ეროვნული უსაფრთხოების მრჩეველმა, ჯეიკ სალივანმა.
• მსგავსი განცხადება გააკეთა გაერთიანებული სამეფოს დაზვერვის ხელმძღვანელმა, ლეიტენანტ გენერალმა ჯიმ ჰოკენჰალმა და განაცხადა, რომ რუსეთის მტკიცება ძალების გაწვევასთან დაკავშირებით არაფერ ხელჩასაჭიდს არ ემყარება.
• მისი თქმით, საზღვართან დამატებითი შეიარაღებული ტექნიკა, ვერტმფრენები და საველე ნაგებობები შეინიშნება.

რას ვადევნოთ თვალი: ვიცე-პრეზიდენტი კამალა ჰარისი ამ დღეებში მიუნხენის უსაფრთხოების კონფერენციას ეწვევა, სადაც ბოლო ორი დეკადის განმავლობაში პირველად არ იქნება რუსული დელეგაცია.

• ჰარისი სიტყვას წარმოთქვამს და ევროპელ კოლეგებს შეხვდება.
• ადგილზე იქნებიან ნატოს გენერალური მდივანი იენს სტოლტენბერგი და ესტონეთის, ლატვიისა და ლიეტუვის ლიდერები.
• კონფერენციის მეორე დღეს ჰარისი უკრაინის პრეზიდენტ ზელენსკისა და გერმანიის კანცლერ ოლაფ შოლცს შეხვდება.