ევროკავშირის სადამკვირვებლო მისიის ხელმძღვანელი, მარეკ შჩიგელის გენადი ბესტაევის გარდაცვალებას ეხმაურება და მწუხარებას გამოთქვამს. მისი თქმით, საქართველოში ევროკავშირის სადამკვირვებლო მისია ბესტაევის საქმეს აკვირდებოდა და კომუნიკაციის პროცესში მონაწილეობდა.

"ღრმად ვარ დამწუხრებული შეტყობინებით, ბატონ გენადი ბესტაევის გარდაცვალების შესახებ და მსურს გულწრფელი სამძიმარი გამოვუცხადო მის ოჯახს. საქართველოში ევროკავშირის სადამკვირვებლო მისია აკვირდებოდა ბ-ნი ბესტაევის საქმეს მას შემდეგ, რაც პირველად გახდა ცნობილი მისი დაკავების შესახებ. მისია ხელს უწყობდა კომუნიკაციას მისი დაკავების პერიოდში, მის საქმესთან დაკავშირებით, ევროკავშირის სადამკვირვებლო მისიის მიერ მართული ცხელი ხაზის მეშვეობით, მათ შორის ჯანმრთელობის მდგომარეობასთან დაკავშირებით და ხელი შეუწყო მის გადმოყვანას ადმინისტრაციულ სასაზღვრო ხაზზე", — აცხადებს ის.

საოკუპაციო ძალების მიერ უკანონო პატიმრობის შემდეგ თბილისის კლინიკაში გადმოყვანილი გენადი ბესტაევი გარდაიცვალა. ის საოკუპაციო ძალებმა 2019 წლის 21 ნოემბერს უკანონოდ დააკავეს. მიმდინარე წლის 2 მარტს ოკუპირებული ცხინვალის ე.წ. სასამართლომ მას 3 წლით უკანონო პატიმრობა მიუსაჯა.