გირჩის ლიდერის, ვახტანგ მეგრელიშვილის განცხადებით, 2016 წელს პაატა ბურჭულაძესა და გიორგი ვაშაძესთან გაერთიანება პირველი, ხოლო, პარტიიდან ზურაბ ჯაფარიძის წასვლა მეორე კატასტროფული შეცდომა იყო. მისი თქმით, პარტია ახლა "ტრავმას იშუშებს".

"ჩვენი აზრით, როდესაც ჩვენ 2016 წელს შეცდომა დავუშვით და პაატა ბურჭულაძესთან, გიორგი ვაშაძესთან და კიდე მემარჯვენეებთან გავერთიანდით, ეს იყო კატასტროფული შეცდომა გირჩის ისტორიაში. მეორე კატასტროფული შეცდომა იყო ჩვენი ლიდერის, ზურაბ ჯაფარიძის წასვლა პარტიიდან.

პირველმა კატასტროფამ, ფაქტობრივად, გარკვეული პერიოდი გაგვაძლებინა, ქუჩაში ვიყავით და მაშინ დავდეთ პირობა, რომ არასდროს, არცერთ პოლიტიკურ ძალასთან ამ ტიპის არაგულწრფელ გარიგებას არ დავდებდით და ჩვენ ახლა ტრავმას ვიშუშებთ, რომელიც არ არის შეცდომა, ეს არის ტრავმა. ეს ტრავმა ჩვენ უნდა მოვიშუშოთ იმ რეჟიმით, რა რეჟიმითაც ჩვენ ვცხოვრობთ, ანუ, სრულიად დამოუკიდებელი პოლიტიკური თამაშით. მაგრამ ეს პოლიტიკური თამაში ნიშნავს ყველასთან საუბარს, მიუხედავად წარსულისა, ისტორიისა, იმიტომ, რომ ასეთი ქვეყანა გვაქვს, სხვა არ არის, თორემ არჩევანი რომ იყოს, კიბატონო", — განაცხადა მან რუსთავი 2-ის ეთერში.

ოთხმა პარტიამ ბლოკი 2016 წელს 18 აგვისტოს შექმნა. ბლოკში გირჩთან ერთად, ბურჭულაძის პარტია, სახელმწიფო ხალხისთვის, ვაშაძის პარტია, ახალი საქართველო, ახალი არჩევანი და ახალი მემარჯვენეები იყო გაერთიანებული. მალევე, 27 სექტემბერს გირჩმა ბლოკი დატოვა.

რაც შეეხება ზურაბ ჯაფარიძეს, მან გასული წლის 4 დეკემბერს განაცხადა, რომ იაგო ხვიჩიასთან, ვახტანგ მეგრელიშვილთან და ალექსანდრე რაქვიაშვილთან ერთად გირჩის კეთებას აღარ აპირებს.

26 დეკემბერს მან ახალი პარტია, გირჩი — მეტი თავისუფლებისთვის ოფიციალურად დააფუძნა.