რუსი ოპოზიციონერი, იგორ ეფრემოვი აცხადებს, რომ ის საქართველოს საზღვარზე არ შემოუშვეს.

"მე და ჩემი შეყვარებული არ შემოგვიშვეს საქართველოში მესაზღვრეებმა. მიზეზი არ აგვიხსნეს. დოკუმენტებში წერია, რომ ჩვენი არშემოშვების მიზეზი "სხვა მიზეზია" და უცნობია, რა. გაუგებარია, რატომ არ გვიშვებენ და ეს სიტუაციაც სრულად ჯოჯოხეთურია", — ამბობს ის სოციალურ ქსელში გავრცელებულ ვიდეოში.

ეფრემოვი ტვიტერზე წერს, რომ პოლიტიკური რეპრესიების გამო ნახევარი წელია იძულებით სომხეთში იმყოფება.

"რუსი ოპოზიციონერების საქართველოში არშეშვება მასობრივი პრაქტიკა ხდება და არ შეიძლება, ეს არ გაწუხებდეს. როცა მე მომიწვიეს საქართველოში, მითხრეს, რომ ეს თავისუფალი ქვეყანაა, რომელიც მხარს არ უჭერს პუტინს და უსაფრთხოა რუსი ოპოზიციონერებისთვის", — აცხადებს ოპოზიციონერი.

On.ge ცდილობს ამის გადამოწმებას შინაგან საქმეთა სამინისტროში და ინფორმაციას განახლებისთანავე შემოგთავაზებთ.

ეს პირველი შემთხვევა არ არის, როდესაც საქართველოში რუსი ოპოზიციონერები არ შემოუშვეს. გასულ წელს ალექსეი ნავალნის გუნდის წევრმა, ლიუბოვ სობოლმა განაცხადა, რომ მას საქართველოში შემოსვლაზე უარი უთხრეს.

კიდევ ერთმა რუსმა ოპოზიციონერმა, დმიტრი გუდკოვმა 31 იანვარს განაცხადა, რომ საქართველოში არ შემოუშვეს. მისი თქმით, უკრაინიდან თბილისში აქტივისტებთან შესახვედრად ჩამოფრინდა და დეპორტაციის გადაწყვეტილებას პოლიტიკურს უწოდა.

საგარეო ურთიერთობათა კომიტეტის თავმჯდომარემ ამაზე თქვა, რომ გუდკოვი იყო იმ დუმის წევრი, რომელმაც აფხაზეთისა და ცხინვალის რეგიონის დამოუკიდებლობა აღიარა, რასაც რუსმა ოპოზიციონერმა დეპუტატმა სიცრუე უწოდა და ახსნა, რომ აფხაზეთის დამოუკიდებლობა დუმამ აღიარა 2008 წელს, ის კი დეპუტატი გახდა 2011 წელს.