სამხრეთ კორეაში ვირუსის გავრცელების პრევენციისთვის ახალი პირბადე გამოუშვეს, რომელიც მხოლოდ ცხვირს ფარავს.

ამ ახალი პირბადის დიზაინის მიზანი ისაა, რომ მისი ტარება ადამიანებმა მაშინაც შეძლონ, როცა რესტორანში, კაფეში, ბარსა და სხვა ნებისმიერ საჯარო ადგილას ჭამენ ან სვამენ.

პირბადის სახელწოდებაა kosk, რომელიც აერთიანებს კორეულ სიტყვას ko (ცხვირი) და ინგლისურ სიტყვას mask (ნიღაბი, პირბადე). პროდუქტი კომპანია Atman-მა დაამზადა და შეკვრა, რომელშიც ათი ცალი "ცხვირბადეა", დაახლოებით $8,13 ღირს.

რეალურად, პირბადე ორი ნაწილისგან შედგება, უბრალოდ შესაფერის დროს შეგიძლია, რომ პირის ნაწილი მოიშორო და მხოლოდ ცხვირი დაიტოვო დაფარული.

ამ იდეას სოციალურ ქსელებში არაერთგვაროვანი გამოხმაურება მოჰყვა და კრიტიკაც დაიმსახურა. მაგალითად, ტვიტერზე ერთ-ერთმა მომხმარებელმა დაწერა: "ეს არაფრით განსხვავდება იმ ხალხისგან, ვინც პირბადეს ცხვირზე ჩამოწეული ატარებს".

სხვადასხვა კვლევის თანახმად, კორონავირუსი ყველაზე მარტივად ორგანიზმში სწორედ ცხვირიდან აღწევს, შესაბამისად, თუნდაც მხოლოდ ცხვირის დაფარვა, შესაძლოა, არც ისეთი სულელური იდეა იყოს.

ავსტრალიელი ეპიდემიოლოგის კეტრინ ბენეტის აზრით, ნიღბით მხოლოდ ცხვირის დაფარვა "უცნაური იდეაა", მაგრამ "სულ არაფერს სჯობს".