პოლიციელების მხრიდან განხორციელებული ძალადობრივი ქმედებების გასაპროტესტებლად საქართველოს რამდენიმე ქალაქში აქციები გაიმართა.

"ის საშინელება, რაც ყველამ ვნახეთ და რასაც მესამე დღეა ვაპროტესტებთ, ეს არის ჩვენი გამოსვლის მიზეზი და ასეთი ხდება ძალიან ბევრი, რასაც ვერ ვხედავთ, დაკეტილ კარს მიღმა, კამერის გარეშე ცემა და ა.შ. რაც ხდება განყოფილებებში, რაც მოხდა რუსთავში, ბათუმში — ახალგაზრდების ცემის ფაქტი. პოლიცია გადაიქცა რაღაც გაურკვეველ რაზმად, პოლიცია დაიცალა მთლიანად პატრიოტი პოლიციელებისგან. დაიტოვა ივანიშვილმა მხოლოდ ის ადამიანები, რომლებიც შეასრულებენ ნებისმიერ ბრძანებას", — განაცხადა თბილისში, ქართული ოცნების ოფისთან მოძრაობა საქართველოსთვის აქტივისტმა ნიკა ნარსიამ.

ბათუმში, აჭარის მთავრობის სახლთან გამართულ აქციაზე ნაციონალური მოძრაობის წევრმა, გიორგი კირთაძემ თქვა, რომ ის, რაც საზოგადოებამ გავრცელებული კადრების საშუალებით იხილა, წარმოუდგენელი და აღმაშფოთებელი იყო და სწორედ ამიტომ არის დღეს რამდენიმე ქალაქში ერთდროულად საპროტესტო აქციები.

"არ შეიძლება ამ ყველაფერთან შეგუება, წარმოუდგენელი, აღმაშფოთებელი იყო ის ყველაფერი, რაც ვნახეთ, ამიტომ არის დღეს საქართველოს რამდენიმე ქალაქში ერთდროულად საპროტესტო აქცია ძალადობის წინააღმდეგ. როცა პოლიცია და კრიმინალი ერთმანეთთან ალიანსშია, როცა დაწინაურება ხდება კლანური ინტერესებით, როცა შერჩა პოლიციას ის, რაც შერჩა ამ ქვეყანაში და უამრავი ფაქტი ვნახეთ, ამიტომ მივედით აქამდე, რომ ბავშვებს ექცევიან ასე. ხომ წარმოგვიდგენია რამდენი კარი დახურულა და იქ მომხდარა ასეთი ამბავი, რამაც დღის სინათლე ვერ იპოვა და საზოგადოებამ ამის შესახებ ვერ გაიგო", — თქვა მან ფორმულას ეთერში.

საპროტესტო აქციები, ასევე, გაიმართა ზუგდიდში, გორსა და თელავში.

კადრები, სადაც ჩანს, რომ პოლიციელი მოქალაქეს სცემს, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს:

"ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო".

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.

ასევე,გუშინ, 25 იანვარს, სოციალურ ქსელში გავრცელდა ვიდეო, სადაც ჩანს, რომ კაცი, რომელსაც, სავარაუდოდ, პოლიციის ფორმა აცვია, ქალზე ფიზიკურად ძალადობს. ის ქალს სახეში რამდენჯერმე ურტყამს და ეჩხუბება. პროკურატურამ გამოძიება გუშინვე დაიწყო.

დღეს, 26 იანვარს პროკურატურამ, ზუგდიდში ქალზე ძალადობის ბრალდებით პოლიციის თანამშრომელი დააკავა. ეს ის პოლიციელია, რომელიც გავრცელებულ ვიდეოში ქალს სცემდა.