დღეს, მთავრობის ადმინისტრაციაში იმ კომისიების პირველი სხდომა გაიმართა, რომლებიც სპეციალური საგამოძიებო სამსახურისა და პერსონალურ მონაცემთა დაცვის სამსახურის უფროსობის კანდიდატებს შეარჩევენ. ეს ის უწყებებია, რომლებიც ინსპექტორის სამსახურის გაუქმების შემდეგ შეიქმნება. ორივე კომისიის შემადგენლობა თითქმის ერთნაირია და ორივეს თავმჯდომარე მთავრობის ადმინისტრაციის ხელმძღვანელი, ილია დარჩიაშვილი იქნება.

სპეციალური საგამოძიებო სამსახურის უფროსის შესარჩევი საკონკურსო კომისიის შემადგენლობა ასეთია:

  • ილია დარჩიაშვილი — მთავრობის ადმინისტრაციის უფროსი;
  • მიხეილ სარჯველაძე — ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე;
  • ანრი ოხანაშვილი — იურიდიულ საკითხთა კომიტეტის თავმჯდომარე;
  • გიორგი მიქაუტაძე — უზენაესი სასამართლოს თავმჯდომარის მოადგილე;
  • ბაკურ აბულაძე — გენერალური პროკურორის პირველი მოადგილე;
  • გიორგი ბურჯანაძე — სახალხო დამცველის მოადგილე;

რაც შეეხება პერსონალურ მონაცემთა დაცვის სამსახურის უფროსის შესარჩევ საკონკურსო კომისიას, ამ შემთხვევში არსებულ შემადგენლობას დაემატება ააიპ უფლებები საქართველოს გამგეობის თავმჯდომარე კარლო ნიკოლეიშვილი.

სპეციალური საგამოძიებო სამსახურის უფროსისა და პერსონალურ მონაცემთა დაცვის სამსახურის უფროსის შესარჩევი კონკურსები 17 იანვრის გამოცხადდა. კანდიდატს უნდა ჰქონდეს მართლმსაჯულების, სამართალდამცავი ორგანოების სისტემაში ან ადამიანის უფლებათა დაცვის სფეროში მუშაობის არანაკლებ 5-წლიანი გამოცდილება. თითოეულ თანამდებობაზე შეირჩევა არანაკლებ 2 და არაუმეტეს 5 კანდიდატისა. შერჩეული კანდიდატებიდან პრემიერმინისტრი პარლამენტს ასარჩევად თითოეულ თანამდებობაზე 2-2 კანდიდატს წარუდგენს.

პარლამენტმა ქართული ოცნების ინიცირებულ კანონპროექტი სახელმწიფო ინსპექტორის სამსახურის გაუქმების შესახებ დაჩქარებულად განიხილა და ახალ წლამდე დაამტკიცა. კანონპროექტის მიხედვით, უქმდება სახელმწიფო ინსპექტორის თანამდებობა და სამსახური. მის მაგივრად იქმნება ორი — სპეციალური საგამოძიებო და პერსონალურ მონაცემთა დაცვის სამსახურები.

კანონის მიღების შეჩერება მოითხოვა ევროკავშირმა, ევროპის საბჭოს ადამიანის უფლებათა კომისარმა, გაერომ, საქართველოში აკრედიტებული დიპლომატიური კორპუსის წარმომადგენლებმა, ევროპარლამენტარებმა, ამერიკის ელჩმა. ყველა მათგანმა მიუთითა, რომ დამოუკიდებელი სახელმწიფო ინსტიტუტის დაშლა ასეთი დაჩქარებული წესით, გაუმჭვირვალედ, იყო მიუღებელი და ამ კანონის მიღება უნდა დაფუძნებოდა ფართო დისკუსიებს, ღია და ღრმა განხილვებს, მათ შორის, ამ დისკუსიებში პირველ რიგში ჩართული უნდა ყოფილიყო სახელმწიფო ინსპექტორის სამსახური, რეფორმა უნდა განხორციელებულიყო ფრთხილად და თანამდებობის პირების მიმართ მსგავსი მსუსხავი ეფექტის თავიდან არიდების გზით.

თავად სახელმწიფო ინსპექტორმა, ლონდა თოლორაიამ აღნიშნა, რომ ეს არის შტურმი სამსახურზე, რომელიც თავის გადაწყვეტილებებს არასოდეს არავის უთანხმებდა. მისი თქმით, მმართველ პარტიას სამსახურის გაუქმების შესახებ მათთან არანაირი კომუნიკაცია არ ჰქონია. მისივე თქმით, მაშინ, როდესაც სამშობიაროდან უწყების გაძლიერების პროექტს წერდა, პარლამენტი მისი გაუქმების შესახებ კანონპროექტს ამზადებდა.