შინაგან საქმეთა სამინისტრომ თბილისის ერთ-ერთი კლუბის თანამშრომელი იძულების ბრალდებით დააკავა. საგამოძიებო მოქმედებების ფარგლებში უწყებამ კონკრეტული კლუბი ჯერ დალუქა, შემდეგ კი ბრალდებული დააკავა.

"გამოძიებით დადგინდა, რომ მიმდინარე წლის 14 იანვარს, თბილისის ცენტრალურ უბანში მდებარე ერთ-ერთი კლუბის თანამშრომელმა — ე.ჩ,-მ ამავე კლუბის სტუმარს, გერმანელ ტურისტს — 1994 წელს დაბადებულ მ.ო.-ს შეკვეთის შეუსაბამო თანხა იძულების გზით გადაახდევინა. კერძოდ, ბრალდებულმა მ.ო. აიძულა და შეკვეთილი ლუდის ღირებულების ნაცვლად გაცილებით დიდი თანხა გადაახდევინა", — აცხადებენ უწყებაში.

გამოძიება სისხლის სამართლის კოდექსის 150-ე მუხლის 1-ლი ნაწილით მიმდინარეობს, რაც გულისხმობს იძულებას — ადამიანისთვის ქმედების თავისუფლების უკანონო შეზღუდვას. აღნიშნული დანაშაული ისჯება 2 წლამდე გამასწორებელი სამუშაოთი ან 18 თვემდე თავისუფლების აღკვეთით.