საქართვლოს პრეზიდენტი, გიორგი მარგველაშვილი მიიჩნევს, რომ რუსეთის ფედერაციის პროპაგანდის გასაბათილებლად საქართველოს პარტნიორ ქვეყნებში საჭიროა ერთიანი მესიჯი. მისი აზრით, ამ მხრივ გადამწყვეტია საზოგადოების და ხელისუფლების ერთიანი პოზიციის ჩამოყალიბება. ამის შესახებ მარგველაშვილმა დღეს ნატო-საქართველოს სახალხო დიპლომატიის ფორუმში - NGPD Forum 2017 სიტყვის გამოსვლისას განაცხადა.

მისი თქმით, ბოლო პერიოდში, საქართველოს ევროპული ინტეგრაციის პროცესებთან დაკავშირებით მდგრადი და ერთიანი პოზიცია აჩვენეს ქართულმა საზოგადოებამ, არასამთავრობო სექტორმა და პოლიტიკურმა პარტიებმა. თუმცა, ის ფიქრობს, რომ ამ მიმართულებით მუშაობა მუდმივად გასაღრმავებელი და გასაძლიერებელია.

როგორც მარგველაშვილმა თქვა, რეგიონში უსაფრთხოების გარემოს რეალურ შესუსტებას იწვევს ჰიბრიდული ომი, კიბერდაპირისპირებები, რუსეთის მიერ საზოგადოებაზე აგიტაციის მეშვეობით გავლენის სერიოზული მცდელობა.