ალერგოლოგ-იმუნოლოგი ბიძინა კულუმბეგოვი აცხადებს, რომ ბავშვებში ომიკრონის გავრცელების რისკი მაღალია. კულუმბეგოვი ამის მიზეზად ასახელებს იმას, რომ 12 წლამდე მოსახლეობის აცრა არ არის დაშვებული. ის მშობლებს მოუწოდებს, მინიმალური სიმპტომების შემთხვევაშიც კი არ გაუშვან მოზარდი სკოლაში.

"აუცრელი მოსახლეობის გარკვეული ნაწილი [არის ბავშვები]. ბუნებრივად — ჩვენ 12 წლამდე აცრას ვერ ვიყენებთ. იქ არის ყველაზე დიდი არეალი და გასაქანი ომიკრონის, ასეთი სწრაფი, ელვისებური და ხანძრისებური გავრცელების პოტენციის მქონე ვირუსისთვის.

მინიმალური სიმპტომების მქონე ბავშვიც არ უნდა გაუშვას მშობელმა [სკოლაში]. ჩვენ ვიცით, ეს პრობლემები არსებობს, როდესაც გარკვეულწილად მშობელს ბავშვის სახლში დატოვების პრობლემა აქვს, ამიტომ, ჩვენ შევეცადოთ, რომ გავუფრთხილდეთ ერთმანეთის ჯანმრთელობას", — განაცხადა ბიძინა კულუმბეგოვმა.

კულუმბეგოვი აცხადებს, რომ ჯანდაცვის სისტემის მხრიდან სწორი მართვის შემთხვევაში შესაძლებელია სკოლებში მოზარდთა ინფიცირების რისკის შემცირება.