კომპანია Ford Motor ამერიკას სედანის ტიპის ჰიბრიდულ საპატრულო მანქანას სთავაზობს. ახალ მანქანას 2 ლიტრიანი ოთხცილინდრიანი ძრავი და 1,4 კილოვატიანი ლითიუმ-იონის ბატარეა ექნება. მოსალოდნელია, რომ ავტომობილი, ამ შესაძლებლობებით, დაახლოებით 4 ლიტრი ბენზინით 61 კილომეტრის გავლას შეძლებს.

ჰიბრიდული მანქანები არ იქნება მისი წინამორბედი Taurus-ივით სწრაფი, მაგრამ კომპანიის თქმით ახალი მანქანები პატრულირებისთვის საკმარისად სწრაფი იქნება. ახალ მოდელს წლის ბოლოს მიჩიგანისა და ლოს ანჯელესის პოლიცია დატესტავს. იმისთვის, რომ პატრულირების მოთხოვნები დააკმაყოფილოს, მანქანამ უნდა დააკმაყოფილოს აჩქარების, მართვის, დამუხრუჭების, მაქსიმალური სიჩქარის განვითარებისა და ერგონომიულობის სტანდარტები.

როგორც კომპანია ამბობს, როდესაც მანქანის აქსერელატორს ფეხს ხუთი წამის განმავლობაში აჭერთ, მანქანა დევნის რეჟიმში გადადის და ორივე ძრავის, ელექტროსა და საწვავის, მაქსიმალურ შესაძლებლობებს იყენებს. მათი თქმით, მანქანა რთული საპატრული მისიების შესრულებაზეც იქნება მორგებული.

ფორდში ამბობენ, რომ ჰიბრიდული მანქანები საწვავის ხარჯებს მნიშვნელოვნად შეამცირებს. კომპანიის ვარაუდით, თითო მანქანის საწვავის ხარჯი წელიწადში მხოლოდ $3 877 იქნება.

მანქანები, სავარაუდოდ, 2018 წლის შემოდგომაზე გამოვა, ხოლო რა იქნება მისი ფასი ჯერჯერობით უცნობია.

პოლიციის მანქანები დროის უმეტეს ნაწილს გზაზე პატრულირებაში ატარებენ. ჰიბრიდულ მანქანებს სწორედ ამ კომპონენტში აქვთ უპირატესობა.