საზოგადოებრივი ტრანსპორტისთვის განკუთვნილი სამგზავრო ბარათების გაყიდვა ერთი დღით შეჩერდა. მიზეზი უკვე დაბეჭდილ ბარათებზე დაშვებული შეცდომაა. როგორც საქართველოს ბანკში On.ge-ს განუმარტეს, ხვალიდან, 10 იანვრიდან ბარათების გასწორებული ვერსია გაიყიდება. ბანკში აცხადებენ, რომ სამგზავრო აბონიმენტები "მცირედი უზუსტობით" მათმა შვილობილმა კომპანიამ დაბეჭდა.

"საზოგადოებრივ ტრანსპორტში გადახდის სისტემის მართვას საქართველოს ბანკი უზრუნველყოფს, ვადიანი სამგზავრო აბონიმენტების დამზადებას და რეალიზაციას კი საქართველოს ბანკის შვილობილი კომპანია მს+.

სამწუხაროდ, ხსენებული კომპანიის მიერ დაშვებული იყო მცირედი უზუსტობა. ბარათზე დატანილ ტექსტში კი დაშვებული იყო მექანიკური შეცდომა. სწორედ ამის გამო, დღეს, 9 იანვარს, ერთი დღით, შეჩერდება აბონიმენტების გაცემა. ბოდიშს გიხდით შექმნილი დისკომფორტისთვის. უკვე ხვალიდან, 10 იანვრიდან კი განახლდება ბარათის სწორი ვერსიის გაცემა", — აცხადებენ ისინი.

გუშინ, 8 იანვარს სოციალურ ქსელში გავრცელდა ფოტო, სადაც ჩანს, რომ საბაგიროს ნაცვლად, "საბაგარო" წერია. თბილისის მერიაში განაცხადეს, რომ დიზაინი მათ ეკუთვნით, თუმცა, მასზე შეცდომა არ ფიქსირდება. ამ ეტაპზე უცნობია, რა თანხა დაიხარჯა ბარათების ბეჭდვაში და რამდენი ბარათია დაბეჭდილი.

საზოგადოებრივი ტრანსპორტის მომხმარებლებისთვის ახალი სისტემისა და შესაბამისი ტიპის ბარათები შექმნის შესახებ თბილისის მერმა, კახა კალაძემ 22 დეკემბერს განაცხადა. კერძოდ, ყველა ტიპის საზოგადოებრივ ტრანსპორტში, იქნება ეს მეტრო, ავტობუსი თუ მიკროავტობუსი, მგზავრობის ღირებულება 1 ლარი იქნება. ცვლილება თებერვლიდან ამოქმედდება, ბარათების შეძენა კი უკვე შესაძლებელია მეტროს სალაროებსა და საქართველოს ბანკის ექსპრეს ფილიალებში.

წაიკითხეთ: