საზოგადოებრივი ტრანსპორტისთვის განკუთვნილი ახალი ბარათები შეცდომით დაბეჭდეს. მასზე საბაგიროს ნაცვლად "საბაგარო" წერია. On.ge ამ საკითხზე მერიას დაუკავშირდა, სადაც გვითხრეს, რომ ბარათის დიზაინი თბილისის მერიას ეკუთვნის, თუმცა მასზე შეცდომა არ ფიქსირდება.

კითხვას, ვინ დაბეჭდა ბარათები, მერიაში პასუხობენ, რომ საქართველოს ბანკმა. ასევე, უწყების პრესსამსახურის ინფორმაციით, ბეჭდვის საფასური მერიას არ გადაუხდია.

დავუკავშირდით საქართველოს ბანკსაც, სადაც ამბობენ, რომ ეს არ არის ბანკის შეცდომა და დამატებით დეტალებს შეგვატყობინებენ მას შემდეგ, როცა გაარკვევენ.

ამ ეტაპზე უცნობია, რა თანხა დაიხარჯა ბარათების ბეჭდვაში და რამდენი ბარათია დაბეჭდილი. ამის შესახებ ინფორმაციას მიღებისთანავე შემოგთავაზებთ.

ასე გამოიყურება ტრანსპორტის ახალი ბარათი

ფოტო: ნინო ჭელიძე

საზოგადოებრივი ტრანსპორტის მომხმარებლებისთვის ახალი სისტემისა და შესაბამისი ტიპის ბარათები შექმნის შესახებ თბილისის მერმა, კახა კალაძემ 22 დეკემბერს განაცხადა. კერძოდ, ყველა ტიპის საზოგადოებრივ ტრანსპორტში, იქნება ეს მეტრო, ავტობუსი თუ მიკროავტობუსი, მგზავრობის ღირებულება 1 ლარი იქნება. ცვლილება თებერვლიდან ამოქმედდება, ბარათების შეძენა კი უკვე შესაძლებელია მეტროს სალაროებსა და საქართველოს ბანკის ექსპრეს ფილიალებში.

წაიკითხეთ: